Noqonuniy qum-shag‘al aralashmasini kovlab olayotgan shaxslarga jarima qo‘llanildi, deb xabar bermoqda Namangan viloyati Ekologiya boshqarmasi axborot xizmati.
Ma’lum qilinishicha, Namangan viloyati Ekologiya boshqarmasi tezkor guruhi tomonidan Uychi tumanidan oqib o‘tuvchi Norin daryosida navbatdagi reyd tadbiri tashkil etildi. Mazkur reyd davomida tumanning uch nafar fuqaro tomonidan o‘z boshqaruvidagi ekskavator Norin daryosi o‘zanidan noqonuniy qum-shag‘al qazib olib, yuk tashuvchi mashinalarga yuklayotgani aniqlandi.
Holat bo‘yicha huquqbuzarlarning har biriga Ma’muriy javobgarlik to‘g‘risidagi kodeksning 70-1-moddasi 1-qismiga bilan bazaviy hisoblashning 50 barobari 18 750 000 so‘mdan jami 56 250 000 so‘m jarima tayinlandi.
Ma’lumot uchun, Ma’muriy javobgarlik to‘g‘risidagi kodeksining 70-1-moddasining 1-qismida daryolarning o‘zanlarini tozalashga va qirg‘oqlarini mustahkamlashga doir ishlarni amalga oshirish tartibini buzganlik uchun javobgarlik belgilangan bo‘lib, unga ko‘ra fuqarolarga bazaviy hisoblash miqdorining o‘ttiz baravaridan ellik baravarigacha, mansabdor shaxslarga esa — ellik baravaridan yuz baravarigacha miqdorda jarima solinishi belgilab qo‘yilgan.
Daryolar o‘zanlaridagi noruda materiallarni qazib olishga muddatsiz moratoriy joriy etilgan
Prezident farmoni bilan Chirchiq, Sangzor, Zarafshon, Norin, Qashqadaryo, Surxondaryo va Sirdaryo daryolari o‘zanlaridagi noruda materiallarni qazib olishga 2024-yil 1-maydan muddatsiz moratoriy joriy qilindi. Noqonuniy qazib olish ishlari natijasida tabiatga yetkazilgan zarar uchun javobgarlik ham kuchaytirildi.
Shunga qaramay, noqonuniy qum-shag‘al qazib olish davom etmoqda. 12-fevral kuni Surxondaryo va Toshkent viloyatlarida tabiiy qum xomashyosini o‘zboshimchalik bilan qazib olish holatlari fosh etildi. Toshkent viloyati Bekobod tumanida noqonuniy ravishda qum qazib olinishi oqibatida tabiatga 100 milliard so‘mdan ortiq zarar yetkazildi.
13-yanvarda Samarqandning ikki hududida qum-shag‘al qazib olinishi oqibatida tabiatga 826 milliard so‘m zarar yetkazilgandi.
Izoh (0)