Зарафшон дарёсининг “Урганжи” маҳалласи ҳудудидан оқиб ўтувчи ҳудудида назорат тадбирлари ўтказилди, деб хабар берди Экология вазирлиги.
Маълум қилинишича, текширув давомида Навоий вилояти Навбаҳор туманида яшовчи фуқаро И.И. ўзига тегишли техника воситалари ёрдамида дарё тубидан ноқонуний равишда қум-шағал аралашмасини қазиб олиб, транспорт воситаларига ортганлиги аниқланди.
Ҳуқуқбузарга нисбатан маъмурий баённома расмийлаштирилиб, БҲМнинг 30 баравари — 11 млн 250 минг сўм миқдорида жарима белгиланди. Шунингдек, ҳуқуқбузарнинг техника воситалари жарима майдончасига жойлаштирилди.
Бундан ташқари, табиатга етказилган 14 млн 152 минг 320 сўм зарар ҳам ундирилиши белгиланди.
Шунингдек, ҳодиса жойидан қочишга уринган юк автомашиналари ҳайдовчилари ички ишлар органлари орқали аниқланди. Давлат инспекторларининг талабларини бажармаганликлари учун уларга нисбатан маъмурий иш қўзғатилди.
Дарёлар ўзанларидаги норуда материалларни қазиб олишга муддатсиз мораторий жорий этилган
Президент фармони билан Чирчиқ, Сангзор, Зарафшон, Норин, Қашқадарё, Сурхондарё ва Сирдарё дарёлари ўзанларидаги норуда материалларни қазиб олишга 2024 йил 1 майдан муддатсиз мораторий жорий қилинди. Ноқонуний қазиб олиш ишлари натижасида табиатга етказилган зарар учун жавобгарлик ҳам кучайтирилди.
Шунга қарамай, ноқонуний қум-шағал қазиб олиш давом этмоқда. 12 февраль куни Сурхондарё ва Тошкент вилоятларида табиий қум хом ашёсини ўзбошимчалик билан қазиб олиш ҳолатлари фош этилди. Тошкент вилояти Бекобод туманида ноқонуний равишда қум қазиб олиниши оқибатида табиатга 100 миллиард сўмдан ортиқ зарар етказилди.
13 январда Самарқанднинг икки ҳудудида қум-шағал қазиб олиниши оқибатида табиатга 826 миллиард сўм зарар етказилганди.
Изоҳ (0)