Toshkent viloyati Piskent tumanida tunda noqonuniy qum-shag‘al qazib olayot fuqarolar qo‘lga tushdi.
Viloyati Ekologiya, atrof-muhitni muhofaza qilish va iqlim o‘zgarishi boshqarmasining xabar berishicha, holat Ichki Ishlar boshqarmasi post-patrul xizmati xodimlari bilan birgalikda o‘tkazilgan reyd davomida aniqlangan.
Fuqarolar Piskent tumani hududidan oqib o‘tuvchi Ohangaron daryosining eski o‘zani bo‘yida yuklagich yordamida qum-shag‘al aralashmalari Howo rusumli yuk mashinasiga ortayotgan bo‘lgan.
Mazkur holat yuzasidan tabiatga 3 696 204 960 so‘m (uch milliard olti yuz to‘qson olti million ikki yuz to‘rt ming to‘qqiz yuz oltmish) zarar yetkazilgani aniqlandi va avtotransport vositalari Piskent tumanida joylashgan jarima maydoniga joylashtirildi.
Holat yuzasidan to‘plangan hujjatlarga huquqiy baho berish uchun prokuratura organiga yuborilgan.
Daryolar o‘zanlaridagi noruda materiallarni qazib olishga muddatsiz moratoriy joriy etilgan
Prezident farmoni bilan Chirchiq, Sangzor, Zarafshon, Norin, Qashqadaryo, Surxondaryo va Sirdaryo daryolari o‘zanlaridagi noruda materiallarni qazib olishga 2024-yil 1-maydan muddatsiz moratoriy joriy qilindi. Noqonuniy qazib olish ishlari natijasida tabiatga yetkazilgan zarar uchun javobgarlik ham kuchaytirildi.
Shunga qaramay, noqonuniy qum-shag‘al qazib olish davom etmoqda. 12-fevral kuni Surxondaryo va Toshkent viloyatlarida tabiiy qum xom ashyosini o‘zboshimchalik bilan qazib olish holatlari fosh etildi. Toshkent viloyati Bekobod tumanida noqonuniy ravishda qum qazib olinishi oqibatida tabiatga 100 milliard so‘mdan ortiq zarar yetkazildi.
13-yanvarda Samarqandning ikki hududida qum-shag‘al qazib olinishi oqibatida tabiatga 826 milliard so‘m zarar yetkazilgandi.
Izoh (0)