Ijtimoiy tarmoqlarda Zomin milliy tabiat bog‘ida yo‘l bo‘yida ayiq yurgani haqida video tarqaldi. Jizzax viloyati Ekologiya, atrof-muhitni muhofaza qilish va iqlim o‘zgarishi boshqarmasi holat yuzasidan maʼlumot berdi.
Unga ko‘ra, Zomin milliy tabiat bog‘i nazoratchilari tomonidan hududni tunda nazorat qilish chog‘ida yo‘l bo‘yida ayiq yurganining guvohi bo‘lgan va bu holat mobil tasvirga olingan. 14-may kuni Milliy bog‘ matbuot xizmati tomonidan bu tasvir o‘z rasmiy kanaliga joylangan va tarmoq foydalanuvchilari tomonidan bu holat noto‘g‘ri talqin etilib tarqatilgan.
“Zomin tog‘lari bag‘ridagi ushbu tabiat maskani nafaqat o‘zining noyob flora va faunasi bilan, balki uni asrab-avaylayotgan insonlar bilan ham qadrli. Inspektorlarning mehnati ko‘pincha jamoatchilik nigohidan yiroqda qoladi, biroq ularning har kechasi — tabiatga sadoqat, ona yurtga mehr-muhabbat namunasidir”, deyiladi boshqarma xabarida.
Bundan avval Bo‘stonliq tumani Burchmulla davlat o‘rmon xo‘jaligiga qarashli Axsarsoy hududida qo‘ng‘ir ayiq o‘ldirib ketilgani haqida xabar berilgandi. Shuningdek, Surxondaryoda yashaydigan, o‘ta noyob tur bo‘lgan, Xalqaro va O‘zbekiston Qizil kitobiga kiritilgan targ‘il sirtlonning (do‘lta) Sho‘rchi tumanida o‘ldirilgani haqida xabar berilgan edi.
Izoh (0)