Surxondaryo viloyatining Denov tumanida yashovchi fuqarolar R.Sh. va E.A. tomonidan Surxon daryosi o‘zanidan noqonuniy ravishda qum-shag‘al xomashyosi yuk texnikasiga yuklanayotgani aniqlandi. Bu haqda Ekologiya vazirligi xabar berdi.
Holat yuzasidan huquqbuzarlarga nisbatan maʼmuriy bayonnoma rasmiylashtirilib, har biriga 11 mln 250 ming so‘mdan jarima belgilandi.
Shuningdek, tabiatga 8 mln 709 ming 120 so‘m miqdorida zarar yetkazilgani maʼlum bo‘ldi. Huquqbuzarlar jami 31 mln 209 ming 120 so‘m miqdorida tovon to‘laydigan bo‘ldi.
Nazorat tadbirlari davom ettirilmoqda.
Daryolar o‘zanlaridagi noruda materiallarni qazib olishga muddatsiz moratoriy joriy etilgan
Prezident farmoni bilan Chirchiq, Sangzor, Zarafshon, Norin, Qashqadaryo, Surxondaryo va Sirdaryo daryolari o‘zanlaridagi noruda materiallarni qazib olishga 2024-yil 1-maydan muddatsiz moratoriy joriy qilindi. Noqonuniy qazib olish ishlari natijasida tabiatga yetkazilgan zarar uchun javobgarlik ham kuchaytirildi.
Shunga qaramay, noqonuniy qum-shag‘al qazib olish davom etmoqda. 12-fevral kuni Surxondaryo va Toshkent viloyatlarida tabiiy qum xomashyosini o‘zboshimchalik bilan qazib olish holatlari fosh etildi. Toshkent viloyati Bekobod tumanida noqonuniy ravishda qum qazib olinishi oqibatida tabiatga 100 milliard so‘mdan ortiq zarar yetkazildi.
13-yanvarda Samarqandning ikki hududida qum-shag‘al qazib olinishi oqibatida tabiatga 826 milliard so‘m zarar yetkazilgandi.
Izoh (0)