G‘azoda sog‘liqni saqlash tizimi butunlay inqiroz yoqasida. Isroil hujumlar nishonini ko‘chirilgan aholiga boshpana bo‘layotgan tibbiyot muassasalariga qaratgan. Sektordagi ocharchilik fonida jarohatlangan va og‘ir kasallarga qon donorlari yetishmovchiligi jiddiy muammo bo‘lmoqda.
Ma’lum qilinishicha, Isroil tomonidan o‘rnatilgan blokada tufayli sektorda jiddiy qon tanqisligi yuzaga kelmoqda. Bunga sabab — aholi o‘rtasida kuchayayotgan ocharchilik va suvsizlik. Bugungi kungacha anklavda Isroilning sun’iy ochlik siyosati tufayli 193 nafar falastinlik halok bo‘lgan, ularning 5 nafari so‘nggi 24 soat ichida hayotdan ko‘z yumgan.
Al Jazeera’ning xabar berishicha, sektorda hozirda faqat 3 ta shifoxona — Ash-Shifo, Al-Aqso va Nosir kasalxonalari faoliyat yuritmoqda. Ammo ularning qon zaxiralari nihoyatda kamayib ketgan. Odamlar yaqinlarini qutqarish uchun qon topshirishga urinayotgan bo‘lsa-da, ularning ko‘pchiligi suvsizlik va oziq-ovqat tanqisligi tufayli bunga yaroqsiz deb topilmoqda. Ash-Shifo shifoxonasi qon bo‘limi rahbari Amani Abu Uda shunday deydi:
“Donorlik aholimiz sog‘lig‘iga xavf tug‘diradi. Sababi, ular qon topshirgandan so‘ng bir necha soniyalarda hushidan ketmoqda. Bu esa bir vaqtning o‘zida qimmatli qon birligini ham yo‘qotishga sabab bo‘lmoqda”.
JSST rahbari Tedros Adhanom Gebreyesus G‘azoda 14 800 dan ortiq bemor zudlik bilan maxsus davo choralariga muhtojligini ma’lum qilib, xalqaro hamjamiyatni favqulodda chora ko‘rishga chaqirgan.
Bu paytda, Isroil zarbalari ortidan faqatgina 6-avgustning o‘zida kamida 44 nafar falastinlik halok bo‘lgan. G‘azo shahridagi “Shayx Radvon” mahallasiga tunda aviazarbalar berilishi oqibatida, ko‘plab tinch aholi jarohat olgani xabar qilinmoqda. BMT boshqaruvidagi Shayx Radvon sog‘liqni saqlash markazi ham hujum nishoniga aylangan. Ushbu hujumlarga guvohlardan biri shunday dedi:
“Tunda kechki ovqat paytida birdan odamlar qichqira boshladi. Hech narsani ololmadik — na ovqat, na kiyim, na to‘shak. Faqat qochdik”.
Halok bo‘lganlar orasida BMT va AQSH ko‘magidagi G‘azo gumanitar jamg‘armasi (G‘GJ) orqali yordam olishga uringan 18 nafar odam ham bor. Jamg‘arma may oyi oxirida faoliyat boshlaganidan beri 1 560 nafardan ortiq falastinlik, yordam olishga uringan vaqtda Isroil tomonidan turli bahonalar bilan o‘ldirilgan. BMTning bir guruh vakillari G‘GJ faoliyatini tanqid qilib, tashkilotni “gumanitar yordamdan harbiy va geosiyosiy maqsadlar yo‘lida foydalanish”da ayblagan.
Isroil bosqinlari G‘azo oziq-ovqat infratuzilmasini deyarli butunlay yo‘q qilgan. Yangi hisob-kitoblarga ko‘ra, sektordagi ekin maydonlarining atigi 8,6 foizi foydalanish uchun yaroqli, ulardan faqatgina 1,5 foizi zarar ko‘rmagan.
Shuningdek, Isroil sektorga tibbiy asbob-uskunalar va yonilg‘i yetkazib berilishini ham to‘sib qo‘ygan. Bu esa qator shifoxonalarning faoliyati to‘xtatilishiga olib kelgan. BMT bosh kotibi Antonio Guterrishning vakili Farhan Haqning aytishicha, so‘nggi 2 kun ichida Kerem Shalom chegara punkti orqali 300 ming litr yonilg‘i olingan. Ammo bu zaruriyatning juda kam miqdorini qoplaydi xolos.
“Bugungi kunda sektorda 100 dan ortiq muddatidan oldin tug‘ilgan chaqaloqning hayoti xavf ostida”, dedi Haq.
U, shuningdek, mart oyidan beri 100 dan ortiq tibbiyot xodimlari, jumladan jarrohlar va mutaxassislar G‘azo hududiga kiritilmaganini ma’lum qilgan. Bu orada, HAMAS butun dunyo bo‘ylab G‘azodagi ocharchilikka qarshi namoyishlar o‘tkazishga chaqirmoqda:
“Shaharlarda, poytaxtlarda, AQSH va Isroil elchixonalari oldida namoyishlar, yurishlar va protestlar o‘tkazishga chaqiramiz”, deyiladi tashkilot chaqirig‘ida.
Izoh (0)