Isroil va AQSH Eronda yadro quroli va uni yetkazib berish vositalari bo‘lishiga yo‘l qo‘ymaslik uchun hamma narsani qiladi. Bu haqda Isroil bosh vaziri Binyamin Netanyaxu Quddusda AQSH davlat kotibi bilan qo‘shma matbuot anjumanida ma’lum qildi.
“Bizning siyosatimiz va mening siyosatim Eron yadro quroli yoki uni yetkazib berish vositalariga ega boʻlishiga yo‘l qo‘ymaslik uchun qoʻlimizdan kelgan barcha ishni qilishdan iborat. Bu oʻzgargani yo‘q. Lekin, shubhasiz, AQSH bilan birgalikda ishlayotganimiz ham ushbu umumiy maqsad uchun muhim ahamiyatga ega”, — dedi Isroil hukumati rahbari.
U AQSH davlat kotibi Entoni Blinken bilan xavfning oldini olish bo‘yicha umumiy siyosatni shakllantirish borasida juda yaxshi muhokama o‘tkazganini aytdi.
Netanyaxu shuningdek, dunyo Tehrondagi rejimning o‘z xalqiga nisbatan vahshiyligiga, shuningdek, Eronning o‘z chegaralari va Yaqin Sharq mintaqasidan tashqarida bosqinchilik olib borayotganiga guvoh bo‘layotganini ta’kidladi. Shu sababdan ushbu rejim yadro quroliga ega bo‘lmasligi kerak, degan umumiy fikr mavjud, deya ta’kidladi Isroil bosh vaziri.
Eslatib oʻtamiz, 28-yanvardan 29-yanvarga oʻtar kechasi Eronda strategik obyektlar – harbiy omborlar, oʻq-dorilar ishlab chiqarish markazi, aviabaza va neftni qayta ishlash zavodlarida qator portlashlar sodir boʻldi. OAV xabarlariga ko‘ra, hujum ortida Isroil va AQSH turgan bo‘lishi mumkin. AQSH bu portlashlarga aloqasi yo‘qligini ma’lum qildi. Isroil esa vaziyatga munosabat bildirgani yo‘q.
Izoh (0)