AQSH va Isroil Tehrondagi yadroviy va harbiy ambitsiyalarini ushlab turishning yangi yo‘llarini qidirayotgan bir paytda Isroil Erondagi mudofaa majmuasini nishonga olib, dronlardan zarba berdi. Bu haqda AQSH rasmiylari va operatsiyadan xabardor odamlarga tayanib, The Wall Street Journal xabar berdi.
Eron rasmiylariga ko‘ra, mamlakat havo mudofaasi uchta kichik kvadrokopter tomonidan Eron kosmik tadqiqotlar markaziga tegishli Isfahondagi o‘q-dorilar ishlab chiqaruvchi zavodga qaratilgan hujumining oldini olgan. Eron havo hujumidan mudofaa tizimi dronlardan birini urib tushirgan, yana ikkitasi ombor ustida portlab, tomga ozgina zarar yetkazgani. Eron tashqi ishlar vaziri Husayn Amir Abdullahiyon portlashni “qo‘rqoqlik zarbasi” deb atagan.
“Bunday harakatlar bizning mutaxassislarimizning tinch yadroviy taraqqiyotga bo‘lgan qat’iyati va niyatiga ta’sir qila olmaydi", — degan u.
Isroil harbiylari dron hujumiga izoh berishdan bosh tortgan.
WSJ’ning ta’kidlashicha, dron zarbasi Isroil tomonidan 2009-yildan 2021-yilgacha bo‘lgan davrda oxirgi marta Eron ichida bir qator operatsiyalar o‘tkazishga ruxsat bergan bosh vazir Benyamin Netanyaxu boshchiligidagi yangi o‘ta o‘ng koalitsiya hukumati ostida amalga oshirilgan birinchi hujumdir.
Dron hujumi Isroil va Amerika rasmiylari Eronning beqarorlashtiruvchi operatsiyalariga qarshi kurashishning yangi usullarini, jumladan, Rossiya bilan harbiy hamkorlikni chuqurlashtirishni muhokama qilayotgan paytga to‘g‘ri kelgan.
AQSH Markaziy razvedka boshqarmasi direktori Uilyam Berns o‘tgan hafta Eron va boshqa mintaqaviy muammolarni muhokama qilish uchun Isroilga e’lon qilinmagan holda safar qilgani aytilmoqda. AQSH Davlat kotibi Entoni Blinken 30-yanvar kuni Eron va boshqa mintaqaviy masalalar yuzasidan AQSH-Isroil muzokaralarini davom ettirish uchun Isroilga kelishi rejalashtirilgan.
O‘tgan hafta AQSH va Isroil har ikki mamlakatning 7500 dan ortiq harbiylarini qamrab olgan tarixdagi eng yirik qo‘shma harbiy mashg‘ulotlarini boshlagan. Isroilning yuqori darajadagi generali o‘tgan hafta The Wall Street Journal’ga Isroil va AQSH eng yomon ssenariyga tayyorlanayotganini aytgan.
Mavzuga doir:
Izoh (0)