Google korporatsiyasi yadro energetikasi loyihalarini ishlab chiquvchi Elementl Power atom startapi bilan hamkorlik shartnomasini imzoladi. Bu haqda Google korporatsiyasi sayti ma’lum qildi.
Ta’kidlanishicha, kelishuv 2035-yilgacha ishga tushirilishi mo‘ljallangan umumiy quvvati 1 800 MVt bo‘lgan uchta yangi atom elektr stansiyasiga sarmoya kiritishni nazarda tutadi. Biroq qurilishning aniq texnologiyalari, muddatlari va joylashuvi hali oshkor qilinmagan.
Yangi stansiyalarning e’lon qilingan quvvati an’anaviy AESlarga nisbatan ancha past: masalan, 2023-yilda ishga tushirilgan Jorjiya shtatidagi Vogtl stansiyasi umumiy quvvati 4 500 MVt bo‘lgan to‘rtta reaktorga ega. Shu bilan birga, McKinsey ma’lumotlariga ko‘ra, ma’lumot markazlarining energiyaga bo‘lgan talabi asosan sun’iy intellekt texnologiyalarining rivojlanishi tufayli 2015-yildagi 30 MVt dan 2024-yilda 200 MVt gacha ko‘tarilgan.
2022-yilda tashkil etilgan Elementl Power o‘zini “texnologik jihatdan betaraf” ishlab chiquvchi sifatida taqdim etib, hozircha birorta loyihani amalga oshirmagan. Kompaniya rahbariyati, jumladan, bosh direktor Kristofer Kolbert (NuScale Power eksperti) kichik modulli reaktorlarga (SMR) e’tibor qaratmoqda.
Bu Google’ning so‘nggi yarim yil ichida atom sohasidagi ikkinchi kelishuvi hisoblanadi. 2024-yil oktyabr oyida korporatsiya Kairos Power bilan erigan tuz reaktorlarini ishlab chiqish uchun birlashdi. Biroq The Register tahlilchilarining fikricha, texnologik gigantlarning bunday qadamlari ham 2027-yilga kelib kutilayotgan energiya tanqisligini bartaraf eta olmaydi.
Google’ning energiya iste’moli o‘sishi sun’iy intellektning rivojlanishi bilan bevosita bog‘liq. Kompaniyaning 2024-yilgi hisobotida ta’kidlanishicha, sun’iy intellekt infratuzilmasi tufayli issiqxona gazlari chiqindilari yil davomida 13 foizga, 2019-yildan beri esa 48 foizga oshgan. Shu bilan birga, Alphabet 2025-yilda ma’lumotlar markazlarini kengaytirishga 75 milliard dollar sarmoya kiritishni rejalashtirmoqda, bu esa energiya tarmoqlaridagi yuklamani yanada oshiradi.
Izoh (0)