Turkiyada STM NETA 300 nomli yangi suv osti droni muvaffaqiyatli sinovdan o‘tkazildi. U harbiy-dengiz kuchlarining minalarga qarshi kurash missiyalarida qo‘llanilishi kutilmoqda. Bu haqda Anadolu xabar berdi.
STM NETA “Uchuvchisiz avtonom suv osti transport vositasi” loyihasi doirasida ishlab chiqilgan. Dron birinchi marta 2024-yil 22-oktyabrda SAHA EXPO ko‘rgazmasida taqdim etilgan. STM kompaniyasi Turkiyada dengiz platformalari va avtonom tizimlar sohasida yetakchi hisoblanadi.
“Yaqinda STM NETA 300 ning dengiz sinovlarini boshladik. Dengiz texnikasi, avtonom platformalar va qo‘mondonlik-boshqaruv tizimlari imkoniyatlarini birlashtirib, texnikani ochiq dengizga olib chiqishga muvaffaq bo‘ldik.
Basseyn sinovlari yakunlangach, dengiz sinovlari bosqichida platformaning sensorlari, kameralari va avtonom navigatsiya tizimlari tekshirildi. Endi tizimning umumiy ishlashini tekshirib ko‘rsak bo‘ladi,” dedi STM bosh direktori O‘zgur Guleruz.
STM NETA 300 metrgacha chuqurlikda ishlay oladi. Dron yon tomondan skanerlovchi va bo‘shliqni to‘ldiruvchi sonar (tovush impulslarini chiqarib, ularning qaytishini aniqlaydigan va o‘lchaydigan qurilma) bilan jihozlangan. Qurilma minalarni aniqlash va tozalash ishlari bilan shug‘ullanadi.
Izoh (0)