Germaniya federativ respublikasida “Germaniya Qirolligi” ayirmachilik tashkiloti taqiqlanib, o‘zini monarx deb e’lon qilgan Peter Fitzek hibsga olindi. Bu haqda Politico nashri xabar bermoqda.
“Bu ekstremistlar Germaniya hududida parallel davlat tuzib, jinoiy moliyaviy faoliyat bilan shug‘ullanishgan”, deydi Germaniya ichki ishlar vaziri Aleksandr Dobrindt.
Vazirning ma’lum qilishicha, reydlar natijasida “qirollik”ning to‘rt nafar yetakchisi, jumladan, o‘zini “qirol Peter I” deb e’lon qilgan soxta monarx qamoqqa olingan. Dobrindtning aytishicha, tashkilot o‘zining hokimiyatga bo‘lgan da’volarini antisemitik fitna nazariyalari bilan asoslagan.
2012-yilda oshpaz va karate murabbiyi Peter Fitzek tomonidan ta’sis etilgan “Germaniya Qirolligi” 6 mingga yaqin tarafdorga ega bo‘lib, reyxsbyurgerlar harakati ichidagi eng yirik uyushma hisoblanadi. Taxminan 20 ming kishidan iborat harakat a’zolari GFRning qonuniyligini tan olmaydilar va o‘zlarini “nemis reyxi” fuqarolari deb hisoblaydilar. Monarxistik, ksenofobik va antisemitik qarashlarga ergashadilar.
Izoh (0)