Германия федератив республикасида “Германия Қироллиги” айирмачилик ташкилоти тақиқланиб, ўзини монарх деб эълон қилган Петер Фитзек ҳибсга олинди. Бу ҳақда Politico нашри хабар бермоқда.
“Бу экстремистлар Германия ҳудудида параллел давлат тузиб, жиноий молиявий фаолият билан шуғулланишган”, дейди Германия ички ишлар вазири Александр Добриндт.
Вазирнинг маълум қилишича, рейдлар натижасида “қироллик”нинг тўрт нафар етакчиси, жумладан, ўзини “қирол Петер I” деб эълон қилган сохта монарх қамоққа олинган. Добриндтнинг айтишича, ташкилот ўзининг ҳокимиятга бўлган даъволарини антисемитик фитна назариялари билан асослаган.
2012 йилда ошпаз ва каратэ мураббийи Петер Фитзек томонидан таъсис этилган “Германия Қироллиги” 6 мингга яқин тарафдорга эга бўлиб, рейхсбюргерлар ҳаракати ичидаги энг йирик уюшма ҳисобланади. Тахминан 20 минг кишидан иборат ҳаракат аъзолари ГФРнинг қонунийлигини тан олмайдилар ва ўзларини “немис рейхи” фуқаролари деб ҳисоблайдилар. Монархистик, ксенофобик ва антисемитик қарашларга эргашадилар.
Изоҳ (0)