Germaniya poytaxti Berlinda 8 va 9-may kunlari Treptov bog‘i va unga tutash hududdagi sovet askarlari yodgorligi yonida SSSR bayroqlarini namoyish etish taqiqlandi. Bu haqda Deutsche Welle xabar berdi.
Tegishli qaror Berlin ma’muriy sudi tomonidan qabul qilingan. Shahar politsiyasi 2-may kuni bir qator yodgorliklar hududida Rossiyaga aloqador bo‘lgan bayroqlarni namoyish etishni taqiqlagan. Biroq jamoat birlashmalaridan biri “yig‘ilishlar erkinligi huquqini cheklash” da’vosi bilan sudga murojaat qilgan. Sudda iltimosnoma rad etilgan va politsiya taqiqi amaldagi qonunlarga zid emasligi ta’kidlangan.
Politsiyachilar qarorining maqsadi jamoat tartibini va “xotira tadbirlarining munosib o‘tkazilishini” ta’minlash ekani aytgan. Shu sabab ma’lum bir ramzlarga nisbatan taqiq o‘rinli deb topilgan.
Ukrainaga qarshi davom etayotgan agressiv urush sababli Sovet bayroqlari boshqa ramzlar qatori zo‘ravonlikka tayyorlikni anglatuvchi ma’no kasb etishi mumkin. Bugungi vaziyatda SSSR bayroqlari har qanday holatda urushni qo‘llab-quvvatlash ifodasi sifatida idrok etilishi ehtimoli bor, deyiladi hujjatda.
Taʼkidlanishicha, yuzaga keladigan “g‘alabali yurish taassuroti” qurbonlarning qadr-qimmatini kamsitadi va jamoat tartibiga xavf soladi. Qaror ustidan Berlin va Brandenburg Oliy ma’muriy sudiga shikoyat qilinishi mumkin.
Izoh (0)