Yaponiya bosh vaziri Fumio Kisida Buyuk Britaniya qirolichasi Yelizaveta II ning davlat dafn marosimida qatnashmaydi, deb xabar bermoqda Kyodo hukumatdagi manbalarga tayanib. Qirolichaning dafn marosimi uchun Yaponiyaga yuborilgan taklifnoma ikki kishiga mo‘ljallangan.
Nashr suhbatdoshlarining aytishicha, dafn marosimida Yaponiya imperatori Naruxito va uning rafiqasi Masako ishtirok etishi rejalashtirilgan.
Qirolicha Yelizaveta II 8-sentabr kuni Shotlandiyadagi Balmoral qasrida 96 yoshida vafot etdi. 10-sentabr kuni Vorislik kengashi shahzoda Charlzni qirol Charlz III nomi bilan Buyuk Britaniya va Shimoliy Irlandiya Birlashgan Qirolligining yangi monarxi deb e’lon qildi.
Yelizaveta II ning dafn marosimi 19-sentabr kuni bo‘lib o‘tadi.
Jami hisobda marosimda butun dunyodan 500 ga yaqin yuqori martabali amaldorlar ishtirok etadi. Aksariyat mamlakatlar davlat rahbari va yana bir mehmon uchun taklifnoma olgan.
AQSH prezidenti Jo Bayden hamda Germaniya prezidenti Frank-Valter Shtaynmayer ham dafn marosimida ishtirok etishi xabar qilingandi. Shu bilan birga Yelizaveta II ning dafn marosimiga Rossiya, Belarus va Myanma davlatlari taklif etilmagan. Bundan tashqari, Erondan marosimda faqat elchi ishtirok etadi.
Izoh (0)