O‘z davrining eng yaxshi yarim himoyachilaridan biri sanalgan Toni Kroos o‘tgan yili katta futbol bilan xayrlashdi. Germaniya terma jamoasining sobiq a’zosi faoliyatining asosiy qismini “Real Madrid” safida o‘tkazgan va shu sababdan Ispaniyani ikkinchi vatani sifatida qabul qiladi.
Kroos Yevropaning janubiy qismida o‘tkazgan 10 yili davomida ispan tilini mukammal o‘rgandi va hozirda oilasi bilan u yerda baxtli hayot kechirmoqda. Toni bir necha bor intervyularida Ispaniya o‘zi va oilasi uchun qulay ekanini aytib, bu yerda bexavotir yashashini aytgan. Ko‘p hollarda futbolchilar faoliyatini yakunlagach, vatanga qaytishadi. Biroq Kroos bunday qarorga kelmadi. U hozir ham Madridda yashab kelmoqda. Buning asosiy sababi — muhojirlar.
Bu boshqa Germaniya
Yevropa chempionati chog‘ida Kroos “Lanz und Precht” podkastida ishtirok etib, Germaniyadagi nazoratsiz migratsiya muammosi haqida ochiq gapirdi. Uning fikricha, bu holat so‘nggi yillarda butun dunyoda kuzatilayotgan muammolardan biri — mamlakat xavfsizligini jiddiy ta’sir o‘tkazmoqda. Toni shu sabab farzandlarining hayotini xavf ostiga qo‘yishni istamaydi.
Men Germaniyani hozirgacha buyuk davlatlar qatoriga qo‘shmayman. Ha, u yerda bo‘lish menga yoqadi. Lekin bu men bilgan 10 yil avvalgi Germaniya emas. Xavfsizlik darajasi pasaygan. Agar mendan qizimni kechasi soat 23:00 da Ispaniyada ko‘chaga chiqargan ma’qulmi yoki Germaniyaning yirik shahrida deb so‘rashsa, men hech ikkilanmay Ispaniyani tanlayman, degan futbolchi.
Kroos — muammoni yashirmasdan tan olgan kam sonli yulduzlardan
Toni ehtiyotkorlik bilan, ammo aniq tarzda Germaniya hukumati migratsiya siyosatini tanqid qildi. Odatda g‘arb ommaviy axborot vositalarida bu kabi fikrlar ochiq aytilmaydi, biroq Kroos yuzaga kelgan muammolarni yashirmadi.
Menimcha, Germaniyada migratsiya muammosi mavjud. Olmon yurti doim boshqa yurtdan kelgan odamlarni quchoq ochib kutib olgan. Bu menga yoqadi. Lekin so‘nggi yillarda bu jarayon haddan tashqari nazoratsiz kechmoqda, deya izoh bergan Toni.
2015-yildan boshlab Germaniya Yevropa Ittifoqining yetakchi davlati sifatida millionlab muhojirlarni qabul qilmoqda. Bu oqimga Suriya urushi sabab bo‘lgani aytiladi, lekin keyinchalik Germaniyaga Shimoliy Afrika va Janubiy Osiyoning “yonayotgan” hududlaridan ham ko‘plab odamlar kirib kelishni boshladi.
O‘sha davrda kansler bo‘lib ishlagan Angela Merkel ko‘p marta xalqni tinchlantiruvchi bayonotlar bilan chiqqan, lekin doim uning siyosati jamiyatda qattiq tanqid ostiga olingan. Eng keskin e’tirozlar nafaqat “Germaniya uchun muqobil” partiyasidan, balki Sara Vagenkneht kabi siyosatchilardan ham yangradi.
Afsuski, ko‘plab migrantlar davlatdan katta yordam olishsa-da, bu yerda ishlashni istamadi, ba’zilar esa jamoat tartibini buzdi. Eng ayanchli holatlardan biri — Yevrokomissiya mansabdorining qizini Frayburgda o‘ldirilishi bo‘ldi.
Kroos Ispaniyada yashagan bo‘lsa-da, Germaniyadagi vaziyatdan yaxshi xabardor bo‘lgan. Mahalliy aholining fikrlarini eshitgan va shu bois oilasi xavfsizligi uchun Germaniyaga qaytmaslikni afzal ko‘rdi. Agar Toni Kroosdek inson, ya’ni shaxsiy qo‘riqchi yollab, hashamatli uyda yashash imkoniga ega odam bunday qarorga kelgan bo‘lsa, oddiy odamlar haqida nima deyish mumkin?
Izoh (0)