Yevrokomissiya Vengriyani Yevropa Ittifoqining migratsiya qoidalarini buzganlikda ayblab, Yevropa adliya sudiga da’vo arizasi topshirdi. Bu haqda YK bayonotida ma’lum qilingan.
Ta’kidlanishicha, Budapesht Yevropa Ittifoqining noqonuniy migratsiyaga qarshi kurashish bo‘yicha umumiy siyosatiga putur yetkazmoqda. Chunki Vengriya 2023-yilda noqonuniy muhojirlarning Yevropa Ittifoqi hududiga kirishiga ko‘maklashgani uchun turli muddatlarga qamalgan bir qator shaxslarni muddatidan oldin ozod qildi. Shuningdek, ularning bir nechtasiga boshqa davlatlarda jazoni o‘tashni yakunlashga ruxsat berdi. YK “bu hukmlar chet elda ijro etilishiga ishonch yo‘qligini” alohida ta’kidladi. Boshqacha aytganda, Shimoliy Afrika mamlakatlarida ularni pora evaziga qo‘yib yuborishlari mumkinligidan xavotir bildirdi.
Yevrokomissiyaning ushbu qarori Yevropa Ittifoqi davlatlari tomonidan Yevropa qonunchiligini buzish holatlarini bartaraf etish bo‘yicha yana 14 ta turli tartib-qoidalar bilan birga e’lon qilindi.
Yevrokomissiya bunday qarorlarni har oy qabul qiladi. Ular umumyevropa me’yorlari amal qiladigan har qanday sohaga — madaniyatdan tortib og‘ir sanoatgacha bo‘lgan yo‘nalishlarga taalluqli bo‘lishi mumkin.
Izoh (0)