Bugungi kunda futbol olamida tajribali, katta o‘yinlarda ishtirok etgan va yutuqlarga erishgan murabbiylar yetarlicha topiladi. Biroq hozirgi davr futbolida yosh mutaxassislar ham nimalarga qodir ekanligini isbotlamoqda. Ba’zilariga kichik klublarda o‘zini ko‘rsatib, katta jamoalarni boshqarayotgan bo‘lsa, boshqalariga darrov katta ligalar yoki nomdor terma jamoalarda ishlash imkoniyati nasib etgan.
Masalan, “Arsenal” bosh murabbiyi Mikel Arteta yoki “Bavariya”ni Bundesligada chempion qilgan Vinsent Kompani shular jumlasidandir.
Quyida ayni paytda dunyodagi eng yaxshi 10 nafar yosh murabbiy haqida ma’lumot berishga qaror qildik.
- Uill Still 32 yosh — “Lans”
Belgiya fuqaroligiga ega bo‘lgan, ammo ota-onasi ingliz bo‘lgan Uill Still 2022-yil oktyabrida “Reyms” bosh murabbiyligiga tayinlanganda bor-yo‘g‘i 29 yoshda edi. U ilgari jamoaning yordamchi murabbiyi sifatida faoliyat olib borgan. UEFA Pro litsenziyasiga ega bo‘lmagani uchun har bir o‘yindan keyin klub 25 ming yevro jarimaga tortilar edi. Oradan ko‘p o‘tmay, Still zaruriy kurslarda o‘qishni boshladi va murabbiylik litsenziyasini qo‘lga kiritdi.
U 2022/23-yilgi mavsumda “Reyms” bilan Liga 1 musobaqasida 11-o‘rinni qo‘lga kiritdi va 17 ta o‘yindan iborat mag‘lubiyatsiz seriya qayd etdi. Uill 2024-yil mayida klub bilan kelishgan holda iste’foga chiqdi va tezda “Lans” bilan uch yillik shartnoma imzoladi. U bir qancha vaqt o‘zbekistonlik himoyachi Abduqodir Husanovga ham ustozlik qildi. Ayni paytda Still boshqaruvidagi “Lans”ning o‘yinlarini o‘rtacha baholash mumkin, sababi klub 32-turdan keyin Liga 1 turnir jadvalida 8-pog‘onani egallab turibdi.
- Domeniko Tedesko 39 yosh — hozircha ishsiz
Tedesko 2017-yilda “Shalke” bilan Bundesliga kumush medalini qo‘lga kiritdi. Shundan keyin ushbu mutaxassis nomi OAVda tez-tez chop etiladigan bo‘ldi. Uning Gelzenkirhen klubi safidagi eng muvaffaqiyatli o‘yini “Borussiya Dortmund”ga qarshi uchrashuvda bo‘lgan. Dastlab, uning jamoasi 0:4 hisobida yutqazayotgan edi, lekin keyinchalik “Shalke” tablodagi natijani 4:4 ko‘rinishiga keltira oldi. Mazkur bahsdan keyin Domeniko Bundesligada hafta murabbiysiga aylandi.
Keyinchalik Tedesko Moskvaning “Spartak” hamda Germaniyaning “Leyptsig” klublarida ham faoliyat olib bordi. Shundan so‘ng u Belgiya terma jamoasini boshqaruviga keldi. Ammo 2025-yil boshida Tedesko yomon natijalar fonida lavozimidan ozod etildi va hozircha yangi jamoa bilan shartnoma imzolagani yo‘q.
- Edin Terzich 42 yosh — hozircha ishsiz
Terzich murabbiylik faoliyatini “Borussiya D” akademiyasida boshlagan. 2020-yilda Lyusen Favr ishdan ketganidan so‘ng u dortmundliklarning vaqtincha bosh murabbiyi bo‘ldi. Edin boshqaruvida jamoa Bundesligada bronza medaliga ega chiqdi va keyinchalik rasmiy ravishda bosh murabbiy etib tayinlandi.
Dortmund klubi bilan ketma-ket ikki mavsumda ikkinchi o‘rinni egalladi. 2023/24-yilda uning boshqaruvidagi jamoa Chempionlar Ligasi finali yo‘llanmasiga ega chiqdi, lekin nemis klubi “Real Madrid”ga qarshi bahsda mag‘lub bo‘lib, turnirning kumush medaliga ega chiqdi. Terzich 2024-yil iyunida o‘z istagi bilan klubni tark etdi. Hozirgi kunda u yangi jamoa izlamoqda.
- Tiago Motta 42 yosh — hozircha ishsiz
“Bolonya”ni Yevropa Chempionlar Ligasi musobaqalariga olib chiqqan Motta taktik jihatdan eng zo‘r murabbiylardan biri sanaladi. Uning jamoasi Rikardo Kalafyori va Joshua Zirkze kabi iqtidorli futbolchilarga tayanib o‘ynadi.
Keyinchalik bu futbolchilarning biri “Arsenal”ga, biri “Manchester Yunayted”ga o‘tdi. Mottaning muvaffaqiyati “Yuventus”ning e’tiborini tortdi, biroq turinliklar safidagi qisqa faoliyati omadli kechmadi va ishdan bo‘shatildi. Hozirda Tiago ham o‘ziga yangi klub qidirmoqda.
- Matias Yayssle 37 yosh — “Al-Ahli”
37 yoshli germaniyalik mutaxassis murabbiylik faoliyatini “Leyptsig”, Daniyaning “Brondbyu”, Avstriyaning “Zalsburg” klublarining akademiyasida boshlagan. U professional murabbiy sifatida dastlab “Lifereng” klubida ishladi va ular bilan yaxshi natijaga erishdi.
Shundan so‘ngra “Zalsburg”ga qaytib, ikki mavsumda ikki marta chempionlikni qo‘lga kiritdi. Matias 2023/24-yilgi mavsum “Al-Ahli” bilan Saudiya Pro Ligasi bronza medaliga ega chiqdi. Shuningdek, yaqinda jiddaliklar uning boshqaruvida Osiyo Chempionlar Ligasi g‘olibligini qo‘lga kiritdi.
- Ruben Amorim 40 yosh — “Manchester Yunayted”
Amorim Portugaliyaning “Braga” klubidagi qisqa, ammo yorqin faoliyatidan so‘ng “Sporting”ga o‘tdi. Uning boshqaruvida lissabonliklar 19 yillik tanaffusdan so‘ng chempion bo‘ldi. Faoliyati davomida 5 ta sovrin yutgan murabbiy sifatida Amorim 2024-yil kuzida “Manchester Yunayted” bosh murabbiyligiga tayinlandi. Ammo Rubenning Angliya Premyer Ligasidagi natijalari hali ijobiy emas. Sababi mankunianliklar APL turnir jadvalida quyi pog‘onalardan birini egallab turibdi. Lekin “qizil iblislar” joriy mavsum sovrin yutishi mumkin.
Ayni payt “Manchester Yunayted” Yevropa Ligasida finalga chiqish uchun yaxshi imkoniyatga ega. Jamoa yarim finalning dastlabki uchrashuvida “Atletik” ustidan 3:0 hisobida g‘alaba qozonib, javob bahsi oldidan o‘z imkoniyatini yaxshilab turibdi.
- Vinsent Kompani 39 yosh — “Bavariya”
Mashhur belgiyalik sobiq futbolchi Vinsent Kompani murabbiylik faoliyatini vatanida boshlagan. Ikki yil “Anderlext”da ishlagan mutaxassis 2022-yil Angliyaning “Byornli” klubi bilan shartnoma imzoladi. Jamoa uning boshqaruvida ilk mavsumdayoq Chempionship g‘olibligiga ega chiqdi va APL yo‘llanmasini qo‘lga kiritdi.
Shundan so‘ng “Bavariya” Kompani xizmatlariga murojaat qildi. Garchi mavsum boshi belgiyalik murabbiy uchun oson kechmagan bo‘lsa-da, Bundesligada chempionlikni qo‘lga kiritishni uddaladi. Mazkur sovrin Vinsent uchun murabbiy sifatidagi ilk yirik sovrini hisoblanadi.
- Yulian Nagelsman 37 yosh — Germaniya terma jamoasi
Nagelsmann faoliyatini juda erta boshlagan. U futboldagi omadsiz karyerasidan keyin 21 yoshidayoq murabbiy yordamchisi sifatida ishlagan. Dastlab 2008-yilda “Ausburg”, keyin “Myunxen 1860” jamoalarida faoliyat yuritgan.
2010-yilda “Xoffenhaym” bilan shartnoma imzolagan Yulian 2016-yili asosiy jamoa ustoziga aylandi. Keyinchalik “Leyptsig”dagi faoliyati bilan uning nomi OAVda tez-tez e’lon qilinadigan bo‘ldi. Undan so‘ngra “Bavariya” bilan chempionlikka erishdi. Garchi natijalari yaxshi bo‘lsa-da, Nagelsman 2023-yilda lavozimidan bo‘shatildi.
U 2023-yilda Germaniya terma jamoasiga murabbiy bo‘lib tayinlandi va Yevro-2024 musobaqasida chorak finalga chiqdi.
- Mikel Arteta 43 yosh — “Arsenal”
“Manchester Siti”da Gvardiola yordamchisi bo‘lgan Arteta 2019-yilda “Arsenal” bosh murabbiyiga aylandi.
U londonliklar safidagi birinchi mavsumidayoq Angliya Kubogini qo‘lga kiritdi. So‘nggi yillarda klubni chempionlik uchun kurashadigan darajaga olib chiqdi, biroq ikki mavsum ketma-ket “Siti”ga imkoniyatni boy bergan bo‘lsa, 2024/25-yilda ularni “Liverpul” dog‘da qoldirdi. Shunga qaramay, “Arsenal”dagi o‘sish uning murabbiylik salohiyatini yaqqol ko‘rsatmoqda.
- Xabi Alonso 43 yosh — “Bayer Leverkuzen”
Alonso 2022-yil oktyabrida “Bayer”ni qabul qilib oldi. U Germaniyadagi ilk mavsumida 6-o‘rinni egalladi. 2023/24 mavsumida esa klubni ilk marta Bundesliga chempioniga aylantirdi, shuningdek uning jamoasi DFB Pokalini ham qo‘lga kiritdi. Shuningdek, o‘tgan mavsum “Bayer” Yevropa Ligasi finaliga chiqdi, ammo leverkuzenliklar hal qiluvchi bahsda “Atalanta”ga mag‘lub bo‘ldi. Biroq Xabi Alonso murabbiy sifatida o‘zini yuqori darajada namoyon etdi.
Yangi mavsum ispaniyalik mutaxassis Germaniyani tark etib, vataniga qaytishi mumkin. Chunki unga Madridning “Real” klubi jiddiy qiziqish bildirmoqda. Ba’zi manbalar murabbiy va klub allaqachon shartnoma borasida kelishib olgani haqida yozmoqda. Kuzatamiz, ehtimol uni yana sobiq jamoasida ko‘rarmiz, faqat endi murabbiy sifatida.
Oliy o‘rin. Islombek Ismoilov 32 yosh — O‘zbekiston U-17 terma jamoasi
Ushbu reytingdagi eng oliy o‘rinni Islombek Ismoilovga berishga qaror qildik. Sababi O‘zbekiston o‘smirlar terma jamoasi uning boshqaruvida U-17 Osiyo Kubogi musobaqasida oltin medalga ega chiqdi.
Ko‘pchilik uchun bu natija yuqoridagilar bilan taqqoslasak, kichik ko‘rinishi mumkin. Ammo uning boshqaruvida jamoa haqiqiy xarakter ko‘rsata oldi. Ayniqsa, finalda ikki kishi kam bo‘lib harakat qilgan bo‘lsa-da, Islombek jamoasini ruhlantira oldi.
Ismoilovni ko‘pchilik Yaypanning “Turon” klubidagi faoliyati bilan tanishadi. Lekin u bungacha “Yozyovon”, “Iftixor” va “Farovon” kabi jamoalarni ham boshqargan. Shundan keyin u 2019-yilda “Turon”ning asosiy jamoasiga tayinlandi va yaypanliklar safida ikki mavsum ishladi. Uni Farg‘ona klubidagi faoliyatini maqtab bo‘lmaydi, lekin Ismoilov o‘zining adolatparvarligi bilan ko‘pchilikning yodida qoldi.
Islombek Ismoilov 2022-yili U-14, 2023-yil U-15, 2024-yil U-16 va 2025-yili O‘zbekiston U-17 terma jamoalarida ishlagan. Garchi yildan-yilga yosh toifasi o‘zgarib turgan bo‘lsa-da, u Osiyo chempioniga aylangan futbolchilarni 3 yildan ko‘proq vaqt davomida tarbiyalagan va joriy yil o‘z mevasini oldi.
Noyabr oyida Qatar maydonlarida 17 yoshli futbolchilar o‘rtasida Jahon chempionati bo‘ladi. Ushbu musobaqaga Islombek Ismoilov jamoasi ham yo‘llanma olgan. Mazkur turnirda ham unga va jamoasiga omad tilaymiz.
Jamshidbek Mahmudov tayyorladi.
Izoh (0)