“Inter” o‘z tarixida yettinchi bor Yevropa Chempionlar Ligasi (avvalgi nomi — Yevropa Chempionlar Kubogi) finaliga yo‘l oldi. Bu haqda “Championat” nashri xabar berdi.
Turnirning 2024/25-yilgi mavsumi yarim finalida milanliklar tom ma’noda tarix yaratdi. “Neradzurrilar” ikki o‘yin natijasiga ko‘ra “Barselona”ni 7:6 hisobida mag‘lub etib, musobaqa final chiptasiga ega chiqdi. Klub bu orqali o‘z tarixida 7 marta mazkur bosqichda o‘ynaydigan bo‘ldi. “Inter” avvalgi olti finaldan uchtasida chempion bo‘lgan bo‘lsa, uch marta imkoniyatni boy bergan.
“Inter”ning finaldagi g‘alabalari:
• 1964-yil — “Real Madrid” ustidan 3:1;
• 1965-yil — “Benfika” ustidan 1:0;
• 2010-yil — “Bavariya” ustidan 2:0.
“Inter”ning finaldagi mag‘lubiyatlari:
• 1967-yil — “Seltik”ga 1:2;
• 1972-yil — “Ayaks”ga 0:2;
• 2023-yil — “Manchester Siti”ga 0:1.
Agar “Inter” joriy mavsumda chempionlikni qo‘lga kiritsa, bu klubning Chempionlar Ligasi tarixidagi to‘rtinchi g‘alabasi bo‘ladi.
“Inter”ning finaldagi raqibi hali aniqlanmadi — ular hal qiluvchi o‘yinda “Arsenal” yoki “PSJ”dan biri bilan to‘qnash keladi. Mazkur bellashuv bugun, 7-may oqshomida Parijdagi “Park de Prens” stadionida bo‘lib o‘tadi. Uchrashuv 00:00 da boshlanadi.
Izoh (0)