Россия Олий суди “Толибон” ҳаракатини экстремистик ташкилотлар рўйхатидан чиқариш ҳақида қарор қабул қилди. Бу ҳақда “РИА Новости” хабар бермоқда.
“Россия Федерацияси Бош прокуратурасининг маъмурий даъвоси қаноатлантирилсин”, дея қарорни эълон қилган судья Олег Нефедов.
Мажлис ёпиқ тарзда ўтказилган. Қарор дарҳол кучга кириши лозим, бироқ унинг устидан шикоят қилиш мумкин.
Россия Бош прокуратурасининг тушунтиришича, судга мурожаат қилишнинг ҳуқуқий асоси сифатида декабрь ойида Маъмурий суд ишларини юритиш кодекси ва “Терроризмга қарши кураш тўғрисида”ги федерал қонунга киритилган ўзгартиришлар хизмат қилган. Ушбу ўзгартиришлар террорчилик ташкилоти терроризмни тарғиб қилиш, оқлаш ва қўллаб-қувватлашга йўналтирилган фаолиятини ёки Россия манфаатларига қарши террорчилик йўналишидаги жиноятларни содир этишни тўхтатган бўлса, унга нисбатан тақиқни тўхтатиб қўйиш имконини беради.
Қўшимча қилинишича, бу ҳолатлар суд мажлисида ўз тасдиғини топган ва суд даъвонинг асосли экани ҳақида хулосага келган.
“Толибон” Афғонистонда 2021 йил ёз охиридан бери ҳокимиятни бошқармоқда. Ўшандан буён улар Россияга бир неча марта ташриф буюришган. Москва мамлакатда шаклланган раҳбариятни расман тан олмаган бўлса-да, Қобул билан ҳамкорликни ривожлантириш учун ҳаракатни террорчилик ташкилотлари рўйхатидан чиқариш режалари ҳақида гапирган.
“Толибон” Россияда 2003 йил 14 февралда Олий суд қарори билан тақиқланган эди. Суд ҳужжатларида 1994 йилда Афғонистонда ташкил топган ҳаракат Чеченистон ҳудудида фаолият юритган ноқонуний қуролли гуруҳлар билан алоқада бўлгани қайд этилган.
2024 йилнинг декабрь ойида Владимир Путин “Толибон” Афғонистондаги қонуний ҳокимият эканини, шу боис Россия “мавжуд воқеликдан келиб чиқиб, муносабатларни тегишли тарзда қуриши лозим”лигини таъкидлаган. Ўша йили Россия Ташқи ишлар вазирлиги ва Адлия вазирлиги президентга “Толибон”ни тақиқланган ташкилотлар рўйхатидан чиқариш мумкинлиги тўғрисида маълумот берган.
Ўтган йилинг сентябрь ойида Қирғизистон “Толибон” ҳаракатини республика ҳудудида фаолияти тақиқланган террористик ва экстремистик ташкилотлар рўйхатидан чиқарганди.
“Толибон” ҳаракати террорчилик фаолияти туфайли БМТ санкциялари остига олинган.
Изоҳ (0)