Qirg‘iziston Respublikasi Jo‘gorku Kenesh deputatlari 16-aprel kuni davlat rahbari tomonidan parlamentga kiritilgan prezident saylovlari sanasini belgilash to‘g‘risidagi qonunni qo‘llab-quvvatladilar. Bu haqda “Kaktus media” xabar berdi.
Deputatlar “Qirg‘iziston Respublikasi prezidenti va Jo‘gorku Kenesh deputatlari saylovi to‘g‘risida”gi konstitutsiyaviy qonunga ovoz berish kunini belgilash bo‘yicha o‘zgartirishlarni uch o‘qishda ma’qullagan.
Markaziy saylov komissiyasi raisi Tinchtik Shaynazarovning ta’kidlashicha, amaldagi qonunga ko‘ra, prezidentning navbatdagi saylovi u saylangan prezidentning vakolat muddati tugaydigan yilning oktyabr oyi uchinchi yakshanbasida o‘tkaziladi va parlament tomonidan saylov kunidan kamida 4 oy oldin tayinlanadi.
“Agar saylov belgilangan muddatda o‘tkazilsa, amaldagi prezident saylangan olti yillik muddat buziladi. Chunki navbatdan tashqari prezident saylovi 2021-yil 10-yanvarda bo‘lib o‘tgan edi. Shu sababli, keyingi saylovlar to‘rtinchi yakshanba kuni o‘tkazilishi va saylov kunidan 4 oy oldin tayinlanishi taklif etilmoqda. Sodda qilib aytganda, prezident saylovini 2027-yil 24-yanvarga belgilashni taklif qilyapmiz”, deydi Shaynazarov.
Qirg‘iziston prezidenti lavozimiga boshqa davlat fuqaroligiga ega bo‘lmagan, ovoz berish kuni 35 yoshga to‘lgan, davlat tilini biladigan va mamlakatda kamida 15 yil yashagan respublika fuqarosi saylanishi mumkin.
2020-yilda Bishkekda bahsli parlament saylovlaridan so‘ng norozilik namoyishlari avj oldi. Ta’kidlanishicha, saylovlar ovoz sotib olish bilan dog‘langan, bu esa oxir-oqibat o‘sha paytdagi prezident So‘ronbay Jenbekovning iste’fosiga va Sadir Japarovning hokimiyat tepasiga kelishiga olib kelgan.
Qirg‘izistonda so‘nggi prezidentlik saylovlari 2021-yil yanvarida o‘tkazildi, unda Japarov olti yillik muddatga prezident etib saylandi.
Izoh (0)