Bishkek markazidagi norozilik aksiyalarida bir kishi halok bo‘ldi, 590 kishi jabrlandi, deb xabar bermoqda “Gazeta.uz” Qirg‘iziston Sog‘liqni saqlash vazirligi ma’lumotlariga tayanib.
Mamlakatning bir necha ming aholisi Qirg‘izistonda bir kun avval bo‘lib o‘tgan parlament saylovlari natijalaridan norozi bo‘lgani uchun mitingga chiqqan. Rasmiy ma’lumotlarga ko‘ra, 16 ta ishtirokchi partiyadan 4 tasigina Jo‘qorg‘i Keneshga o‘tgan, ulardan 2 tasi — hukumatga qarashli. Saylovlarda ko‘p sonli qoidabuzarliklar, shu jumladan, ovozlarni sotib olish qayd etilgan. Mag‘lub bo‘lgan partiyalar vakillari ovoz berish yakunlarini tan olishdan bosh tortdi va Markaziy saylov qo‘mitasini ularni bekor qilishga chaqirdi.
Tinch boshlangan aksiyalar kechga borib, huquq-tartibot organlari bilan to‘qnashuvlarga aylanib ketdi. Kuch vakillari yorug‘lik va shovqin tarqatuvchi granatalar, ko‘zni yoshlantiruvchi gaz va suv zambaraklarini qo‘lladi. Namoyishchilar militsiya bilan to‘qnashuvlarga tayyorlanib, ko‘chaga yotqizilgan plitalarni qo‘porib, ko‘chalarni chiqindi idishlari bilan to‘sib oldi.
Namoyishchilar parlament va prezident ma’muriyati joylashgan Oq uyni egallagach, Milliy xavfsizlik davlat qo‘mitasi binosiga qarab yo‘l oldi. Maxsus xizmat xodimlari bilan muzokaralardan so‘ng ular sobiq prezident Almazbek Atambayevni o‘tgan yildan buyon hibsda saqlanayotgan MXDQ tergov izolyatoridan ozod qildi. Koloniyadan, shuningdek, Atambayev davrida hukumatni boshqargan sobiq bosh vazir Sapar Isakov ham ozod etildi.
“Gazeta.uz”ning Bishkekdagi manbalari 5-oktabr kuni internet va mobil aloqa ishida uzilishlar kuzatilgani haqida xabar bergan. Keyinroq uyali aloqa qayta tiklangan.
Tartibsizlar bo‘layotgan bir paytda Qirg‘iziston prezidenti So‘ronbay Jeenbekov 6-oktabr kuni parlament saylovlarida qatnashgan barcha 16 ta partiya yetakchilari bilan uchrashishini e’lon qildi.
Davlat rahbarining matbuot kotibi To‘lg‘anoy Stamaliyeva ma’lum qilishicha, prezident ayni paytda Bishkekda va u mamlakatdagi barcha siyosiy kuchlarni mulohazakorlikka chaqiradi. Uning aytishicha, yuzaga kelgan vaziyatni hisobga olgan holda So‘ronbay Jeenbekov Markaziy saylov qo‘mitasiga qoidabuzarliklar bilan bog‘liq materiallarni diqqat bilan o‘rganib chiqishni, kerak bo‘lsa, parlament saylovlari natijalarini bekor qilishni tavsiya etmoqda.
“24.kg” agentligi 6-oktabr kuni ertalab namoyishchilar poytaxt meriyasi binosini egallab olgani haqida xabar berdi. Parallel ravishda O‘shda So‘ronbay Jeenbekovni qo‘llab-quvvatlovchi miting boshlandi.
Avvalroq Bishkekda parlament saylovi natijalaridan norozi bo‘lgan minglab odamlar namoyishga chiqqani haqida xabar berilgan edi.
Izoh (0)