Qirg‘izistondagi beshta siyosiy partiya hukumatdan mamlakat parlamenti saylovlari natijasini bekor qilishni talab qilmoqda, deb xabar beradi “RBK”.
“Ota Makon”, “Islohot”, “Sotsial-demokratlar”, “Ozodlik” va “Xalq uyg‘unligi” partiyalarining vakillari saylovoldi kampaniyasidagi qonunbuzilishlar, shuningdek, natijalarni hisoblashdagi soxtalashtirishlar haqida ma’lum qildi.
“Ushbu saylovlarni haqiqiy emas deb tan olish kerak, aks holda biz xalqaro maydonda sharmanda bo‘lamiz”, — deydi “Xalq uyg‘unligi” yetakchisi Melis Mirzakmatov.
Mamlakat Markaziy saylov komissiyasi ma’lumotlari ko‘ra, 97 foizdan ortiq ovozlarning hisob-kitobi bo‘yicha parlamentga 5 foizli “dovon”ni bosib o‘tgan oltita partiya o‘tadi: 16,44 foiz bilan “Ota yurt Qirg‘iziston” (ayni vaqtda mamlakatdagi hukmron partiya), 13,2 foiz bilan “Ishonch”, 10,6 foiz bilan “Rozilik”, 8,07 foiz bilan “Alyans” muxolifat partiyasi va 6,58 foiz bilan “Yagona Qirg‘iziston”, shuningdek, 5,95 foiz to‘plagan “Imon nuri”.
Saylovlarda 1,2 millionga yaqin saylovchi ovoz bergan, jami saylovchilarning 34,39 foizi ishtirok etgan.
28-noyabr kuni kechqurun ovozlarni elektron hisoblash vaqtida saylov komissiyasining saytida nosozlik kuzatildi, u bir necha daqiqa ishlamay qoldi. Sayt yana ishlashni boshlagach, unda ma’lumotlar yangilangani va besh foizli “dovon”dan o‘tgan partiyalar soni o‘ntadan oltita tushib qolgani aniqlangan.
Prezident Sadir Japarov Facebook orqali tizimdagi nosozlikda ovozlarni soxtalashtirishga urinish amalga oshirilgan bo‘lsa, MSK a’zolari “boshi bilan javob berishini” va’da qilgan. Komissiya rahbari Nurjan Shayldabekovaning ma’lum qilishicha, nosozlik faqatgina ma’lumotlarni ko‘rsatuvchi tizimda sodir bo‘lgan, ovozlarni hisob-kitob qiluvchi tizimda emas, shu sababli ma’lumonlar aniqligiga shubha yo‘q.
MDH kuzatuvchilar missiyasi rahbari Vasiliy Volkov saylovlar qonun doirasida, ochiq va shaffof o‘tkazilganini ma’lum qilgan.
Qirg‘iziston parlamenti tarkibi 90 nafar deputatdan iborat va ular besh yil muddatga saylanadi. Aralash saylov tizimiga ko‘ra 54 nafar deputat proporsional tizim bo‘yicha yagona saylov okrugidan saylanadi (siyosiy partiyalar ro‘yxatidagi nomzodlar), 36 nafar deputat esa bir mandatli saylov okruglarida ovoz berish yo‘li bilan saylanadi.
Eslatib o‘tamiz, bir yil avval oktabr oyida Qirg‘izistonda parlament saylovlari bo‘lib o‘tgan, keyinchalik Qirg‘iziston Markaziy saylov komissiyasi Bishkekda ommaviy norozilik namoyishlari boshlanishiga sabab bo‘lgan parlament saylovlari natijalarini haqiqiy emas deb topgandi. 2021-yil avgustda Qirg‘iziston prezidenti Sadir Japarov 28-noyabr kuni Respublika parlamenti deputatlari saylovini o‘tkazish to‘g‘risida farmonni imzolagan.
Izoh (0)