Qirg‘izistonda 28-noyabr kuni bo‘lib o‘tgan parlament saylovlarining dastlabki natijalarini chiqarish vaqtida Markaziy saylov komissiyasi saytida kuzatilgan uzilishlarning sababi texnik xatolik edi. Bu haqda Qirg‘iziston Milliy xavfsizlik davlat qo‘mitasi (GKNB) matbuot markaziga tayanib, “Kommersant” xabar berdi. MSK veb-saytidagi nosozlik tufayli o‘nta partiya go‘yo jami 150 foizdan ortiq ovoz to‘plab, parlamentga kirgani haqida ma’lumot paydo bo‘lgandi.
“Milliy xavfsizlik davlat qo‘mitasi jinoyat ishi bo‘yicha sudgacha bo‘lgan ish yuritish materiallari doirasida 2021-yil 28-noyabrda bo‘lib o‘tgan deputatlar saylovida MSKning rasmiy veb-saytida noto‘g‘ri ma’lumotlar ko‘rsatilgani holatini tekshirmoqda. MSK rasmiy veb-saytida ovoz berishning dastlabki natijalari e’lon qilinayotganda siyosiy partiyalar tomonidan olingan ovozlar soni to‘g‘risida noto‘g‘ri ma’lumotlar ko‘rsatilgan. Bu holat ma’lumotlarni ko‘rsatish sahifasidagi formulaning kod qismidagi xato bilan izohlanadi”, — deyiladi GKNB bayonotida.
Qo‘mita ma’lumotlariga ko‘ra, saytning dasturiy kodini ishlab chiqish jarayonida “byulletenlar soni va nomzodlar uchun berilgan byulletenlar sonini qo‘shishda xatolikka yo‘l qo‘yilgan, buning natijasida ortiqcha ma’lumotlar ko‘rsatilgan”. Saylovlar davomida Markaziy saylov komissiyasining axborot tizimlariga kompyuter hujumlari sodir etildi, biroq ular muvaffaqiyatli qaytarildi, deya xabar beradi Qirg‘iziston GKNB.
28-noyabr kuni Qirg‘izistonda parlament saylovlari bo‘lib o‘tdi. O‘sha kuni kechqurun ovozlarni elektron hisoblash vaqtida saylov komissiyasining saytida nosozlik kuzatildi, u bir necha daqiqa ishlamay qoldi. Sayt yana ishlashni boshlagach, unda ma’lumotlar yangilangani va besh foizli “dovon”dan o‘tgan partiyalar soni o‘ntadan oltitaga tushib qolgani aniqlangan.
Beshta mag‘lubiyatga uchragan partiya saylov natijalarini qonuniy deb tan olishdan bosh tortdi. Ular saylovoldi kampaniyasidagi qonunbuzilishlar, shuningdek, natijalarni hisoblashdagi soxtalashtirishlar haqida ma’lum qilgan. Natijada MSK saylov byulletenlarini qo‘lda qayta sanashni boshlagan.
Prezident Sadir Japarov Facebook orqali tizimdagi nosozlikda ovozlarni soxtalashtirishga urinish amalga oshirilgan bo‘lsa, MSK a’zolari “boshi bilan javob berishini” va’da qilgan.
Izoh (0)