Qirg‘iziston prezidenti ayni vaqtda o‘z lavozimini tark etishga haqqi yo‘qligini aytdi

Qirg‘iziston prezidenti So‘ronbay Jeenbekov mamlakatning yangi bosh vaziri Sadir Japarov bilan uchrashuvda hozirgi paytda iste’foga chiqishga haqqi yo‘qligini ma’lum qildi. Bu haqda Qirg‘iziston prezidenti matbuot xizmatiga tayanib, “Interfaks” xabar berdi.

“Bugun prezident So‘ronbay Jeenbekov va bosh vazir Sadir Japarov o‘rtasida parlament uning nomzodini tasdiqlagach, uchrashuv bo‘lib o‘tdi. So‘ronbay Jeenbekov ayni vaqtda prezidentlik lavozimini tark etishga haqqi yo‘qligini yana bir bor ta’kidlab o‘tdi, chunki bu davlatga zarar keltiradigan voqealar rivojiga olib kelishi mumkin”, — deyiladi prezident matbuot xizmati xabarida.

O‘z navbatida Sadir Japarov asosiy talabini ma’lum qilgan — davlat rahbarining 14-oktabr kuni kechqurun iste’foga chiqishi.

“So‘ronbay Jeenbekov 9-oktabr kuni bayon qilingan pozitsiyasida qat’iy turibdi: u mamlakatni huquqiy yo‘lga qaytargach — parlament saylovi o‘tkazilganidan va prezidentlik saylovi e’lon qilinganidan keyin iste’foga chiqadi”, — deyiladi matbuot xizmati xabarida.

Bundan tashqari, Bishkekdagi hukumat binosi oldida to‘plangan Japarovning tarafdorlari Jeenbekov iste’foga chiqmaguncha norozilik namoyishini to‘xtatmoqchi emas. Komendantlik soati yaqinlashganiga qaramasdan, namoyishchilar 14-oktabr kuni kechqurun hukumat binosi oldida Jeenbekovning ketishini talab qilishda davom etdi.

Eslatib o‘tamiz, Qirg‘iziston prezidenti So‘ronbay Jeenbekov 9-oktabr kuni mamlakatdagi vaziyatni huquqiy maydonga qaytarishni istashini va buning uchun barcha “zarur qarorlarni” imzolashga tayyor ekanligini aytgandi. “Joriy vaziyat yana qonuniy o‘zaniga qaytishi, barcha davlat tuzilmalari va hukumat qonuniy maqomga ega bo‘lishi va mamlakat to‘g‘ri yo‘lga tushib olishi bilan prezident lavozimidan ketishga tayyorman”, — degandi Jeenbekov.

Shuningdek, So‘ronbay Jeenbekov 9-oktabr kuni mamlakat bosh vaziri va hukumatni iste’foga chiqarish to‘g‘risidagi qarorni imzoladi.

Qirg‘iziston prezidenti 13-oktabr kuni parlamentning bosh vazir lavozimiga Sadir Japarovni tayinlash haqidagi qarorini noqonuniy deb topdi va uni mamlakat parlamentiga qaytarib yubordi. Bunga bosh vazirni tayinlash bo‘yicha majlisda deputatlarning yetarlicha soni ishtirok etmagani sabab sifatida ko‘rsatildi.

So‘ronbay Jeenbekov 14-oktabr kuni respublika parlamentining yangi spikeri Kanat Isayevga murojaat qilib, Sadir Japarov rahbarligidagi hukumat tarkibini yana tasdiqlashni taklif qildi, Shundan keyin Qirg‘iziston parlamenti yana bir bor Sadir Japarovni bosh vazirlikka tasdiqladi.