Qirg‘izistonda hokimiyatni zo‘ravonlik bilan egallashga tayyorgarlik ko‘rishda ayblanib, 15 dan ortiq kishi hibsga olindi. Bu haqda Qirg‘iziston Milliy xavfsizlik davlat qo‘mitasi (MXDQ) ma’lumotlariga tayanib, “RBK” xabar berdi.
Qirg‘izistonda 28-noyabr kuni navbatdan tashqari patlament saylovlari o‘tkaziladi. Xavfsizlik qo‘mitasi xabariga ko‘ra, bir guruh shaxslar parlament saylovlari natijalari e’lon qilinganidan keyin tartibsizliklar boshlashni rejalashtirgan.
“Ayrim buzg‘unchi siyosiy kuchlar, jumladan, parlament deputatlari va sobiq yuqori lavozimli amaldorlar boshchiligidagi bir guruh shaxslarning jinoiy faoliyatiga oid rad etib bo‘lmaydigan dalillar qo‘lga kiritildi. Bo‘lajak parlament saylovlari natijalari e’lon qilinganidan keyin ushbu fuqarolar Bishkekda mitinglar uyushtirib, hokimiyatni zo‘ravonlik bilan tortib olishni rejalashtirishgan”, — deyiladi Milliy xavfsizlik davlat qo‘mitasida.
Qo‘mitaning aniqlik kiritishicha, tashkilotchilar 1000 ga yaqin yoshlarni tartibsizliklarda ishtirok etishga jalb qilgan, ular bilan “davlat tuzilmalariga qarshi mafkuralarni singdirishga qaratilgan tizimli uchrashuvlar o‘tkazilgan, ommaviy tartibsizliklar keltirib chiqarish rejalari muhokama qilingan”.
Xavfsizlik davlat qo‘mitasi Qirg‘iziston Respublikasi Jinoyat kodeksining 38 va 309-moddalari “Hokimiyatni zo‘ravonlik bilan egallab olishga tayyorgarlik ko‘rish” bo‘yicha sudga qadar ish boshlagan, bosh prokuratura tomonidan idoralararo tergov guruhi tuzilgan.
Tintuv chog‘ida qo‘lga olinganlardan va ularning ofislaridan o‘qotar qurollar, o‘q-dorilar va giyohvand moddalar topilgan.
“15 dan ortiq gumondor qo‘lga olindi. Mazkur jinoyat ishi bo‘yicha jinoiy guruhning boshqa a’zolari ham aniqlanmoqda, ularning qilmishlariga ham tegishli huquqiy baho beriladi”, — deya qo‘shimcha qildi Milliy xavfsizlik davlat qo‘mitasi.
“24.kg” nashrining yozishicha, maxsus xizmatlar, jumladan, “Chuy intimagi” va “El intimagi” jamoat birlashmalari a’zolari Azamat Musakeyev va Nurbek Kalekeyevni qo‘lga olgan.
Eslatib o‘tamiz, Qirg‘izistonda 2020-yil oktabr oyida bo‘lib o‘tgan avvalgi parlament saylovlardan so‘ng ommaviy norozilik namoyishlari bo‘lib o‘tgandi. Qonunchilik majlisiga saylovda qatnashgan 16 ta partiyaning atigi to‘rttasi o‘tgan, namoyishchilar natijalardan norozi bo‘lib, qaytadan saylov o‘tkazishni talab qilgan. Oqibatda Qirg‘izistonning o‘sha paytdagi prezidenti So‘ronboy Jeenbekov iste’foga chiqgan, ovoz berish natijalari esa bekor qilingan.
Yanvar oyida bo‘lib o‘tgan muddatidan avvalgi prezident saylovlarida Jeenbekov ketganidan keyin hukumat tepasiga kelgan Sadir Japarov g‘olib bo‘ldi, u ovozlarning qariyb 80 foizini to‘pladi. Japarov prezident hokimiyatini mustahkamlash bilan shug‘ullanishini ma’lum qilgan.
May oyida Japarov yangi konstitutsiyani imzoladi. Yangi asosiy qonun boshqaruvning prezidentlik shakliga o‘tishini va respublikada hukumat tizimini tashkil etish bilan bog‘liq boshqa bir qator o‘zgarishlarni, shu jumladan parlament a’zolari sonini hozirgi 120 kishidan 90 kishigacha qisqartirishni nazarda tutadi.
Oktabr oyida Qirg‘iziston prezidenti “Qirg‘iziston Respublikasi Vazirlar Mahkamasi to‘g‘risida”gi qonunga imzo chekdi va o‘z vakolatlarini sezilarli darajada kengaytirdi.
Izoh (0)