Қирғизистон Республикаси Жўгорку Кенеш депутатлари 16 апрель куни давлат раҳбари томонидан парламентга киритилган президент сайловлари санасини белгилаш тўғрисидаги қонунни қўллаб-қувватладилар. Бу ҳақда “Кактус медиа” хабар берди.
Депутатлар “Қирғизистон Республикаси президенти ва Жўгорку Кенеш депутатлари сайлови тўғрисида”ги конституциявий қонунга овоз бериш кунини белгилаш бўйича ўзгартиришларни уч ўқишда маъқуллаган.
Марказий сайлов комиссияси раиси Тинчтик Шайназаровнинг таъкидлашича, амалдаги қонунга кўра, президентнинг навбатдаги сайлови у сайланган президентнинг ваколат муддати тугайдиган йилнинг октябрь ойи учинчи якшанбасида ўтказилади ва парламент томонидан сайлов кунидан камида 4 ой олдин тайинланади.
“Агар сайлов белгиланган муддатда ўтказилса, амалдаги президент сайланган олти йиллик муддат бузилади. Чунки навбатдан ташқари президент сайлови 2021 йил 10 январда бўлиб ўтган эди. Шу сабабли, кейинги сайловлар тўртинчи якшанба куни ўтказилиши ва сайлов кунидан 4 ой олдин тайинланиши таклиф этилмоқда. Содда қилиб айтганда, президент сайловини 2027 йил 24 январга белгилашни таклиф қиляпмиз”, дейди Шайназаров.
Қирғизистон президенти лавозимига бошқа давлат фуқаролигига эга бўлмаган, овоз бериш куни 35 ёшга тўлган, давлат тилини биладиган ва мамлакатда камида 15 йил яшаган республика фуқароси сайланиши мумкин.
2020 йилда Бишкекда баҳсли парламент сайловларидан сўнг норозилик намойишлари авж олди. Таъкидланишича, сайловлар овоз сотиб олиш билан доғланган, бу эса охир-оқибат ўша пайтдаги президент Сўронбай Женбековнинг истеъфосига ва Садир Жапаровнинг ҳокимият тепасига келишига олиб келган.
Қирғизистонда сўнгги президентлик сайловлари 2021 йил январида ўтказилди, унда Жапаров олти йиллик муддатга президент этиб сайланди.
Изоҳ (0)