Qirg‘iziston Markaziy saylov komissiyasi mamlakat parlamenti Yuqori Kengashiga o‘tkazilgan saylov natijalarini e’lon qildi, deb xabar beradi “Fergana.ru”. Oliy qonunchilik organiga 5 foizli “dovon”ni bosib o‘tgan oltita partiya o‘tgan.
“Ota yurt Qirg‘iziston” (ayni vaqtda mamlakatdagi hukmron partiya) partiyasi 17,32 foiz ovoz to‘plagan va 15 ta deputatlik mandatini qo‘lga kiritgan bo‘lsa, “Ishonch” 13,61 foiz ovoz bilan yangi parlament tarkibidagi 12 ta o‘ringa ega bo‘ladi. Shuningdek, “Rozilik” partiyasi 11 foiz ovoz bilan 9 ta mandat, “Alyans” (8,35 foiz) — 7 ta, “Yagona Qirg‘iziston” (7,04 foiz) — 6 ta va “Imon nuri” (6,17 foiz) — 5 ta o‘ringa ega bo‘lgan.
Ma’lumotlarga ko‘ra, ovoz berish jarayonlarida 1,281 million qirg‘izistonlik yoki jami saylovchilarning 34,94 foizi ishtirok etgan.
Eslatib o‘tamiz, 28-noyabr kuni Qirg‘izistonda parlament saylovlari bo‘lib o‘tdi. O‘sha kuni kechqurun ovozlarni elektron hisoblash vaqtida saylov komissiyasining saytida nosozlik kuzatildi, u bir necha daqiqa ishlamay qoldi. Sayt yana ishlashni boshlagach, unda ma’lumotlar yangilangani va besh foizli “dovon”dan o‘tgan partiyalar soni o‘ntadan oltitaga tushib qolgani aniqlangan.
Beshta mag‘lubiyatga uchragan partiya saylov natijalarini qonuniy deb tan olishdan bosh tortdi. Ular saylovoldi kampaniyasidagi qonun buzilishlar, shuningdek, natijalarni hisoblashdagi soxtalashtirishlar haqida ma’lum qilgan. Natijada MSK saylov byulletenlarini qo‘lda qayta sanashni boshlagan.
Prezident Sadir Japarov Facebook orqali tizimdagi nosozlikda ovozlarni soxtalashtirishga urinish amalga oshirilgan bo‘lsa, MSK a’zolari “boshi bilan javob berishini” va’da qilgan.
Izoh (0)