Qirg‘iziston Xavfsizlik kengashi davlat to‘ntarishiga urinish tashkilotchilari jazolanishini bildirdi

Qirg‘izistonda hokimiyatni zo‘ravonlik bilan egallab olishga urinish tashkilotchilari javobgarlikka tortilishi zarur, dedi respublika Xavfsizlik kengashi kotibi Marat Imonqulov.

“Yosh yigitlardan foydalanganlar javobgarlikka tortilishi shart, degan fikrdaman. Ular buni o‘zlari o‘ylab topmagan bo‘lsa kerak. Ularni mafkuraviy tarbiyalagan tashkilotchilar bor, deb o‘ylayman”, — dedi Imonqulov va mazkur yoshlarni buzg‘unchi mafkuralardan xalos qilish kerakligini qo‘shimcha qildi.

Imonqulovning aytishicha, u hokimiyatni zo‘ravonlik yo‘li bilan egallab olishga tayyorgarlik ko‘rishda gumonlanib hibsga olingan shaxslar bilan uchrashuv o‘tkazgan.

“Avvalroq men bu yoshlar bilan uchrashdim, ular mamlakatda mavjud muammolarni aytdi. Men ularga muammo bor sohani o‘z zimmasiga olishni taklif qildim, ularning nomzodini ko‘rsatishim mumkinligini aytdim, lekin ular rad etdi. Men ularga birovning qo‘lida buzg‘unchi ishlarda foydalaniladigan qurolga aylanib qolmasliklarini aytdim”, — dedi Imonqulov.

26-noyabr kuni Qirg‘iziston maxsus xizmatlari mamlakatda hokimiyatni zo‘ravonlik bilan egallab olishni rejalashtirgan jinoiy guruh faoliyati bostirilgani haqida xabar bergan edi. Qirg‘iziston Bosh prokuraturasi tomonidan mazkur ishni tergov qilish uchun idoralararo tergov guruhi tuzilgan.

Prokuraturada qayd etilishicha, ommaviy norozilik namoyishlarini tashkil etish uchun mingga yaqin tajovuzkor yoshlar tanlab olingan, ular bilan davlat tuzilmalariga qarshi mafkuralarni singdirishga qaratilgan tizimli uchrashuvlar o‘tkazilgan, ommaviy tartibsizliklar keltirib chiqarish rejalari muhokama qilingan va davomiy ravishda hokimiyatni zo‘ravonlik yo‘li bilan egallashga undab kelingan.

26-noyabr kuni Qirg‘iziston Markaziy saylov komissiyasining majlisida respublika Milliy xavfsizlik davlat qo‘mitasi (GKNB) tergovchisi Damir Suvanaliyev MSK a’zolaridan Qirg‘iziston “Yashillar” partiyasining uch nafar deputati Nuris Suyerkulov, Ruslan Akmatboyev va Beknazar Kupeshevni davlat to‘ntarishiga tayyorgarlik ko‘rish ishi bo‘yicha jinoiy javobgarlikka tortishni so‘radi. Qirg‘iziston Markaziy saylov komissiyasi rozilik berdi.

Qirg‘izistonda 28-noyabr kuni parlament saylovlari bo‘lib o‘tmoqda. Shu munosabat bilan 25-noyabr kuni Qirg‘iziston Ichki ishlar vazirligining butun shaxsiy tarkibi kuchaytirilgan xizmat rejimiga o‘tkazilgan.