Eronning Siston Balujiston provinsiyasida noma’lum qurolli shaxslar sakkiz nafar pokistonlikni otib o‘ldirdi. Bu haqda Reuters xabar berdi.
Xabarga ko‘ra, pokistonliklar 12-aprel kuni Mehrestan tumanidagi ustaxonada hujumga uchragan. Hujum Pokiston-Eron chegarasidan taxminan 100 kilometr uzoqlikda sodir bo‘lgan. Qurbonlarning bari Pokistonning Panjob viloyatidan ekani ma’lum. Hujum qilganlar 12 kishidan ortiq bo‘lib, voqeadan so‘ng qochib ketgan.
Tehron elchixonasi va Zahedan shahridagi konsullik Eron rasmiylari bilan birgalikda tergov olib bormoqda. Marhumlarning jasadini vataniga qaytarish muhokama qilinmoqda. Halok bo‘lganlarning shaxsi aniqlangach, ularning o‘limiga oid qo‘shimcha tafsilotlar taqdim etiladi.
Eron Tashqi ishlar vazirligi ushbu hodisani keskin qoraladi. Begunoh odamlarning o‘ldirilishini jinoyat deb atab, bu islomiy va insoniy tamoyillarga zid ekanini ta’kidladi. Eronning tegishli xavfsizlik va sud tizimi jinoyatchilarni aniqlash ustida ishlashini bildirdi.
Hujum uchun javobgarlikni Balujiston milliy armiyasi (BNA) va “Jaish al-Adl” guruhi o‘z zimmasiga oldi
2024-yilda Eron “Jaish al-Adl” guruhining Pokistondagi jangarilarini nishonga olgan edi. Bunga javoban Pokiston Eron hududida joylashgan Balujiston milliy armiyasi bazalariga zarba bergan. Ikkala hudud ham notinch, mineral resurslarga boy va asosan rivojlanmagan. Ikki davlat o‘rtasida bo‘lgan o‘zaro zarbalar so‘nggi yillardagi eng yirik chegara to‘qnashuvlari bo‘ldi.
Izoh (0)