Эроннинг Систон Балужистон провинциясида номаълум қуролли шахслар саккиз нафар покистонликни отиб ўлдирди. Бу ҳақда Reuters хабар берди.
Хабарга кўра, покистонликлар 12 апрель куни Меҳрестан туманидаги устахонада ҳужумга учраган. Ҳужум Покистон-Эрон чегарасидан тахминан 100 километр узоқликда содир бўлган. Қурбонларнинг бари Покистоннинг Панжоб вилоятидан экани маълум. Ҳужум қилганлар 12 кишидан ортиқ бўлиб, воқеадан сўнг қочиб кетган.
Теҳрон элчихонаси ва Заҳедан шаҳридаги консуллик Эрон расмийлари билан биргаликда тергов олиб бормоқда. Марҳумларнинг жасадини ватанига қайтариш муҳокама қилинмоқда. Ҳалок бўлганларнинг шахси аниқлангач, уларнинг ўлимига оид қўшимча тафсилотлар тақдим этилади.
Эрон Ташқи ишлар вазирлиги ушбу ҳодисани кескин қоралади. Бегуноҳ одамларнинг ўлдирилишини жиноят деб атаб, бу исломий ва инсоний тамойилларга зид эканини таъкидлади. Эроннинг тегишли хавфсизлик ва суд тизими жиноятчиларни аниқлаш устида ишлашини билдирди.
Ҳужум учун жавобгарликни Балужистон миллий армияси (BNА) ва “Жаиш ал-Адл” гуруҳи ўз зиммасига олди
2024 йилда Эрон “Жаиш ал-Адл” гуруҳининг Покистондаги жангариларини нишонга олган эди. Бунга жавобан Покистон Эрон ҳудудида жойлашган Балужистон миллий армияси базаларига зарба берган. Иккала ҳудуд ҳам нотинч, минерал ресурсларга бой ва асосан ривожланмаган. Икки давлат ўртасида бўлган ўзаро зарбалар сўнгги йиллардаги энг йирик чегара тўқнашувлари бўлди.
Изоҳ (0)