Shavkat Mirziyoyev 11-oktyabr kuni Ashxobod shahrida turkman shoiri va mutafakkiri Maxtumquli Firog‘iy tavalludining 300 yilligiga bag‘ishlangan “Zamon va sivilizatsiyalarning o‘zaro bog‘liqligi - tinchlik va taraqqiyot asosi” mavzusidagi xalqaro forumda ishtirok etdi.
Prezident matbuot xizmatining ma’lum qilishicha, Turkmaniston prezidenti Serdar Berdimuhamedov raisligida o‘tgan tadbirda Rossiya prezidenti Vladimir Putin, Qozog‘iston prezidenti Qosim-Jo‘mart To‘qayev, Qirg‘iziston prezidenti Sadir Japarov, Tojikiston prezidenti Emomali Rahmon, Eron prezidenti Mas’ud Pezeshkiyon, Pokiston prezidenti Osif Ali Zardariy, Mongoliya prezidenti Uxnaagiyn Xurelsux, Armaniston prezidenti Vaagn Xachaturyan, xorijiy davlatlar parlamentlari rahbarlari va yuqori martabali vakillari, xalqaro va mintaqaviy tashkilotlar rahbarlari ishtirok etdi.
Davlat rahbari o‘z nutqida forumning o‘tkazilishi xalqlarimiz o‘rtasidagi birodarlik va hamjihatlik rishtalarini mustahkamlash, mamlakatlarimizni bir-biriga yanada yaqinlashtirish, boy ma’naviy merosimizni butun dunyoga targ‘ib qilish yo‘lida ulkan amaliy qadam bo‘lishini ta’kidladi.
2024-yilda O‘zbekistonda Maxtumquli Firog‘iy tavalludining 300 yilligi keng nishonlanayotgani ta’kidlandi. Anjuman, seminar, adabiy kecha, tanlov, spektakllar va boshqa tadbirlar o‘tkazilmoqda. O‘zbek va turkman kinoijodkorlari tomonidan shoir haqida hamkorlikda badiiy film suratga olindi.
O‘zbekiston yetakchisi Turkmaniston tashabbusi bilan BMT bosh assambleyasi tomonidan e’lon qilingan "Xalqaro tinchlik va ishonch yili" doirasida kelgusi yili Ashxobod shahrida global sammit o‘tkazilishini qo‘llab-quvvatladi.
Turkmaniston prezidenti Serdar Berdimuhamedov O‘zbekiston prezidentiga mazmunli nutq hamda Maxtumquli Firog‘iy xotirasini abadiylashtirish borasida yurtimizda amalga oshirilayotgan chora-tadbirlar uchun minnatdorlik bildirib, turkman shoiri va mutafakkiri tavalludining 300 yilligi munosabati bilan Shavkat Mirziyoyevni medal bilan mukofotlash to‘g‘risidagi qaror qabul qilinganini ma’lum qildi.
Tadbir nihoyasida forumning yakuniy hujjati qabul qilindi
Shavkat Mirziyoyev 2024-yilning fevralida “Buyuk turkman shoiri va mutafakkiri Maxtumquli Firog‘iy tavalludining 300 yilligini keng nishonlash to‘g‘risida”gi qarorni imzolagandi. Turkmaniston Xalq maslahati raisi Gurbanguli Berdimuhamedov ushbu qaror uchun minnatdorchilik maktubi yo‘llagandi.
Qarorga ko‘ra, Maxtumquli Firog‘iy tavalludining 300 yilligini mamlakatda keng nishonlanadi. Maxtumquli Firog‘iyning “Tanlangan asarlar”i hamda uning hayoti va ijodiy faoliyatiga bag‘ishlangan ilmiy maqolalar to‘plami nashrga tayyorlanadi va chop etiladi. Shuningdek, davlat buyurtmasi asosida O‘zbekiston va Turkmaniston kino ustalari hamkorligida Maxtumquli Firog‘iyga bag‘ishlangan badiiy film yaratiladi.
Shu bilan birga, “Maxtumquli ijodining o‘zbek adabiyoti va sanʼatida tutgan o‘rni” mavzusida xalqaro ilmiy konferensiya o‘tkaziladi.
Izoh (0)