Mintaqa davlatlari turli bahonalar bilan afg‘on fuqarolariga yomon munosabatda bo‘lmoqda, deya Afg‘oniston qochqinlar va repatriatsiya ishlari bo‘yicha vazir v.b. Halil Rahmon Haqqoniy xabar berdi.
“Xalqimiz hech qaysi davlatning ichki ishlariga aralashmaydi va qo‘shni davlatlar ularni haydab chiqarishni bas qilishi kerak”, deb tushuntirdi u.
Haqqoniy davlatlarni hamdardlik ko‘rsatishga chaqirgan.
Sentyabr oyida Eron huquq-tartibot kuchlari rahbari Ahmad Rizo Radan 2025-yilning mart oyi oxirigacha Eronda noqonuniy yashayotgan 2 millionga yaqin afg‘on fuqarosini chiqarib yuborish rejasini e’lon qilgan edi. Mazkur reja mamlakatda afg‘onlarga qarshi namoyishlar va Eron ichki ishlar vaziri Iskandar Momayniyning “mamlakatda noqonuniy qochqinlarning mavjudligi nafaqat ijtimoiy zarar yetkazishi, balki mahalliy aholining ish joylarini ham tortib olayotgani” haqidagi bayonotlar fonida e’lon qilingan.
Yanvar oyida Kobul Islomoboddan afg‘on muhojirlariga nisbatan “shafqatsiz munosabat”larni to‘xtatishni so‘ragan.
“Pokiston hukumatining afg‘on qochqinlariga nisbatan bunday munosabati boshqa mamlakatlarda ham umidsizlik va qarshiliklarga sabab bo‘lmoqda”, degan edi Afg‘oniston muvaqqat hukumati rahbari Muhammad Hasan Oxund Kobulda Pokiston delegatsiyasi bilan uchrashuvda.
Oktyabr oyida O‘zbekistondagi bolalar va o‘smirlar ahvolining global vaziyat tahlili taqdimoti chog‘ida UNICEF vakillari respublikadagi minglab afg‘on qochqinlari qonun doirasidan tashqarida qolayotganini ta’kidlagan. Unga ko‘ra, bu ro‘yxatdan o‘tish va viza olish, uy-joy, oziq-ovqat va sog‘liqni saqlash bilan bog‘liq muammolarni keltirib chiqaradi. Shu bilan birga, hisobotda qayd etilishicha, O‘zbekiston rasmiylari boshpana haqidagi birinchi qonun loyihasini tayyorlashga kirishgan.
Yaqinda Yevropa ittifoqi Afg‘onistondan kelgan barcha ayollarga boshpana berishini ma’lum qilgan edi. Bu bir qator yevropalik ekspertlarning xavotiriga sabab bo‘lgan, ular ushbu tashabbusni qattiq tanqid qilgan va ijtimoiy yordam katta sarmoya talab qilishini hamda ayollardan keyin ularning oilalari oxir-oqibat YIga kelishi mumkinligidan ogohlantirgan.
Izoh (0)