AQSHda istiqomat qilayotgan vatandoshlar o‘rtasida an’anaviy tarzda o‘tkaziladigan “Navruz Cup” futbol turnirining bu yilgi bosqichi ham yuqori saviyada tashkil etildi. Turnir “Mahalla USA” jamiyati tashabbusi bilan o‘tkazilib, unga Nyu-Jersi shtatidagi “Turkiston” jamiyati mezbonlik qildi.
Musobaqada Kaliforniya, Tennessi, Illinoys, Ohayo, Kanzas, Nyu-York va Nyu-Jersidan jami 15 jamoa ishtirok etdi. Turnirda faxriy mehmon sifatida ikki karra Osiyoning eng yaxshi futbolchisi Server Jeparov ishtirok etdi.
Musobaqa yuqori darajada tashkil etilgan. Jamoalarning tayyorgarligi, futbolchilarning mahorati e’tiborga molik. Ularning ayrimlari bemalol O‘zbekiston birinchiligi yoki Pro-ligasida o‘ynay oladi, dedi Jeparov.
Finalda “Lochin” (Kanzas) jamoasi “Dinamo” (Nyu-Jersi) ustidan 2:0 hisobida g‘alaba qozonib, chempionlikni qo‘lga kiritdi. Uchinchi o‘rin esa “Hamkor” (Ohayo) jamoasiga nasib etdi.
Musobaqa doirasida Navro‘z bayrami ham keng nishonlandi: osh, sumalak, sport bellashuvlari va O‘zbekiston xalq artisti Izro Malakovning kuy-qo‘shiqlari ishtirokchilarga bayramona kayfiyat ulashdi.
Otabek Eshmamatov, Nyu-Jersi
Izoh (0)