AQSH davlat kotibi Marko Rubio o‘z qo‘l ostidagi xodimlarga “xristianlikka qarshi tarafkashlik” holatlarini aniqlab, bunday harakat sodir etgan hamkasblari haqida xabar berishni buyurdi. Anonim tarzda yo‘llanadigan xabarda ism-shariflar va boshqa ma’lumotlar bo‘lishi kerak. Ushbu ko‘rsatma ko‘plab amaldorlarni hayratda qoldirib, chalkashlikka solib qo‘ydi, deb yozmoqda Politico.
Xabar qilinishicha, Rubioning buyrug‘iga AQSH prezidenti Donald Tramp tomonidan chiqarilgan farmon asos bo‘lib, tegishli ishchi guruh dastlabki natijalarni muhokama qilish uchun taxminan 22-aprel kuni yig‘ilish o‘tkazadi. Hujjat davlat departamenti xodimlarini bir-birlari ustidan anonim shaklda “chaquvchilik qilish”ga undaydi.
“Hisobotlar iloji boricha batafsil bo‘lishi kerak, jumladan, ism-shariflar, sanalar va joylashuv (masalan, elchixona yoki voqea sodir bo‘lgan ichki ofis)”, deyiladi xabarda.
Hujjat davlat kotibi Marko Rubio nomidan butun dunyo bo‘ylab elchixonalarga yuborilgan. Ko‘rsatmalar, shuningdek, departamentning barcha xodimlariga tarqatilgan xabarnomada ham e’lon qilingan.
Davlat departamenti rasmiylari mazkur tashabbusga hayrat va xavotir bilan munosabat bildirdi. Ular buning ortida yaxshi niyat turgan bo‘lishi mumkinligini istisno etmay, tashkilotda xristianlikka qarshi tarafkashlik mavjudligi haqidagi taxminlarni asossiz deb atashdi. Rasmiylar Rubioning ko‘rsatmasi qo‘rquv muhitini yuzaga keltirishi mumkinligidan ogohlantirmoqda.
Izoh (0)