AQSH Markaziy razvedka boshqarmasi (MRB) sovet askarlari noma’lum uchar jismlar tarqatgan nurdan toshga aylanib, halok bo‘lgani haqidagi hisobotini e’lon qildi. Maxfiylikdan chiqarilgan hujjat boshqarma veb-saytida e’lon qilindi.
Xabarga ko‘ra, 1991-yilda Sovet Ittifoqi parchalangani va Mixail Gorbachyov iste’foga chiqqanidan keyin AQSH razvedkasi KGBning ko‘plab materiallarini, jumladan, Sibirdagi harbiy qismga noma’lum uchar jism hujumi haqidagi 250 sahifali faylni olgan.
Faylda nafaqat hujjatli fotosuratlar va chizmalar, balki voqea guvohlarining ko‘rsatmalari ham bo‘lgan. Jumladan, 1989—1990-yillarda sovet harbiy obyektlaridan biri ustida likopcha ko‘rinishidagi noma’lum uchar jism paydo bo‘lgan. Unga “yer-havo” sinfidagi raketa bilan zarba berilgan. Shundan so‘ng obyekt yerga qulab tushgan, undan go‘yoki “katta boshli va katta qora ko‘zli” beshta kichik gumanoid chiqqan.
Omon qolgan ikki askarning guvohlik berishicha, kelgindilar bir-biriga yaqinlashib, oval shaklidagi “bir jismga” aylangan va u hushtak chalib, yorqin oq nur tarata boshlagan. Bir necha soniyadan so‘ng u yanada yorqinlashgan va yonib ketgan. Shu payt voqeani kuzatib turgan 23 nafar askar tosh ustunga aylanib qolgan. Faqat ikkita askar tirik qolgan, chunki ular soyada turgan va chaqnashdan ta’sirlanmagan.
Hisobotda ta’kidlanishicha, noma’lum uchar jism va “tosh qotgan askarlar” qoldiqlari Moskva yaqinidagi maxfiy ilmiy-tadqiqot institutiga olib ketilgan. Razvedka vakilining aytishicha, agar bu ma’lumotlar haqiqatga to‘g‘ri kelsa, hodisa o‘ta xavfli holatdir.
Sibirdagi hodisa haqida avval hech qanday rasmiy xabar berilmagan. Hisobotda ma’lumot manbai sifatida “Ternopol oqshomi” gazetasining “Kosmik qasos” sarlavhasi ostida qayta chop etilgan maqola ko‘rsatilgan.
Izoh (0)