Rossiya kosmosda yadroviy qurolni joylashtirishga intilmoqda, bu esa Yer atrofida aylanayotgan minglab sun’iy yo‘ldoshlarni xavf ostiga qo‘yishi mumkin. NATO bosh kotibi Mark Ryutte shunday bayonot berdi.
Rossiyaning kosmosda yadroviy qurol joylashtirish imkoniyatlarini o‘rganayotganligi haqida xabarlar bor. Bu bizni juda tashvishga solmoqda, dedi u Welt am Sonntag nashriga bergan intervyusida.
Ryuttening so‘zlariga ko‘ra, sun’iy yo‘ldoshlar NATO a’zolarining mudofaasida, jumladan, Ukrainani Rossiya tajovuzidan himoya qilishda va odamlarning kundalik hayoti uchun muhim ahamiyatga ega.
U Yer orbitasida, ya’ni 7000 ga yaqin qurilma aylanayotgan hududda kosmik yadroviy qurolni joylashtirish Moskva uchun “o‘z imkoniyatlarini oshirish” ekanini aytdi.
Kosmos xuddi quruqlik, dengiz, havo va kibermakon kabi bizning tiyib turish siyosatimiz va mudofaamiz uchun juda muhim, dedi NATO bosh kotibi.
Bundan tashqari, Ryutte alyans tomonidan “kosmosdagi chaqiriqlarga” qarshi turish uchun “kichik”, ammo manyovrli va yaxshi himoyalangan sun’iy yo‘ldoshlar ishlab chiqilayotganini eslatib o‘tdi. Shuningdek, NATO davlatlari milliy kosmik qo‘mondonlik markazlarini yaratish ustida ishlayotganini aytdi. Bu mamlakatlar koinot bo‘yicha razvedka ma’lumotlarini almashmoqda.
Kosmosda qurollanish poygasining oldini olish bo‘yicha xalqaro kelishuv 1967-yilda kuchga kirgan. Uni 114 davlat, jumladan, Rossiya ham imzolagan. Biroq shartnoma kosmosdagi harbiy faoliyatni to‘liq cheklamaydi. Kelishuv tanqidchilarining ta’kidlashicha, hujjat zamonaviy sun’iy yo‘ldosh tizimlaridan kelib chiqadigan xavflarni yetarlicha aks ettirmasligi mumkin.
AQSH generali Maykl Getleyn avvalroq Xitoy koinotdagi imkoniyatlarini kengaytirish doirasida Yer orbitasida sun’iy yo‘ldoshlar o‘rtasida “havo janglari”ni boshlaganini ma’lum qilgandi.
Izoh (0)