Rossiya Bosh shtabi generallari prezident Vladimir Putinga ikki-uch oy ichida Ukrainaning frontdagi mudofaasi qulashiga va’da bergan. Bu haqda Kremlga yaqin manbalarga tayanib, Reuters xabar berdi.
Manbalarga ko‘ra, Putin o‘z armiyasi jang maydonida g‘alaba qozonayotganiga ishonmoqda. Shu sababli u AQSH prezidenti Donald Trampning urushni 8-avgustga qadar tugatish talabi rad etilishi ehtimoli bor. Tramp ilgari bu talab bajarilmasa, Rossiya bilan savdo qiladigan davlatlarga sanksiyalar joriy etishini aytgan edi.
Putin Ukrainaning to‘rtta viloyati — Donetsk, Lugansk, Xerson va Zaporoje ustidan to‘liq nazorat o‘rnatish rejasidan voz kechmagan. Rossiya prezidenti 2024-yilning kuzidan beri rekord darajadagi yutuqlarni olib kelgan yozgi hujumni to‘xtatishdan ma’no ko‘rmayapti.
Ukrainadagi DeepState loyihasi ma’lumotlariga ko‘ra, Rossiya armiyasi iyul oyida 564 kvadrat kilometr hududni egallagan, bundan bir oy oldin ham deyarli shuncha maydon bosib olingan. Oldinga siljish sur’ati 2023-yil noyabridan beri eng yuqori darajada bo‘ldi. O‘sha vaqtda rus qo‘shinlari ming kvadrat kilometrdan ortiq hududni nazoratga olgandi.
AQSHdagi Urushni o‘rganish instituti (ISW)ning Rossiya bo‘yicha bosh eksperti Jorj Barros fikricha, hozirgi yo‘qotishlar sharoitida Putin urushni yana 12–16 oy davom ettira oladi. U taxminan bir yildan so‘ng Rossiya byudjet zaxiralari ham, front uchun yetarli “ko‘ngillilar” topish imkoniyatlari ham tugashi mumkinligini aytdi.
Izoh (0)