Raqobat qo‘mitasi insofsiz raqobatni sodir etgan Yandeks Market reklamasi ishi bo‘yicha Uzum Market foydasiga qaror chiqardi. Bu haqda qo‘mita matbuot xizmati xabar berdi.
Raqobat qo‘mitasiga Uzum Market MCHJ XKdan kelib tushgan murojaat asosida, YandexGo UB MCHJ tomonidan televideniye va ijtimoiy tarmoqlar orqali namoyish etilgan Yandeks Market reklamasi orqali YandexGo UB MCHJ Uzum Market MCHJ XKga nisbatan insofsiz raqobat harakatlarini amalga oshirib, “Raqobat to‘g‘risida”gi qonun talablarini buzayotgani, iste’molchilarni chalg‘itayotgani hamda Uzum Market MCHJ XKning ishchanlik obro‘siga putur yetkazayotgani alomatlari bo‘yicha Raqobat qo‘mitasi maxsus komissiyasi tomonidan 12-iyunda ish qo‘zg‘atilgandi.
Maxsus komissiya tomonidan ishni ko‘rib chiqish natijasida:
- YandexGo UB MCHJ reklamasidagi aktrisaning binafsha rangli ko‘ylagi va rolikning dastlabki kadrlari Uzum Market MCHJ XKning avvalgi videolaridagi obrazlarga vizual va konseptual jihatdan o‘xshashligi;
- reklama roligidagi bosh qahramonning uzum dastasini ko‘tarib “a, bu marketmi?!” deb berilgan savolidan so‘ng, yon-atrofdagi reklama ishtirokchilarining bosh qahramonning savoliga nisbatan salbiy holatdagi munosabati (reaksiyasi);
- reklama roligida rolik ishtirokchisining “ajoyib market” deganidan so‘ng, bosh qahramonning uzum dastasini ko‘tarib “a, bu marketmi?!” degan savoli orqali tomoshabinda Uzum Market haqida so‘z borayotgani haqida taassurot uyg‘otilgani. Shundan so‘ng, aktrisaning “yo‘q, bu boshqa market” degan javobi orqali Yandeks Market ustunligi haqida ishora qilingani aniqlandi.
Yuqoridagi holatlar orqali “YandexGo UB” MCHJ “Raqobat to‘g‘risida”gi qonunning 21-moddasida nazarda tutilgan noto‘g‘ri taqqoslash, ya’ni raqobatchi xo‘jalik yurituvchi subyektni yoki uning tovarini tovarning ustunligi haqida tasavvur hosil qiluvchi so‘zlardan yoki ramzlardan tovarning xolisona tasdiqqa ega bo‘lgan tavsifini yoki taqqoslash parametrlarini ko‘rsatmagan holda foydalanib taqqoslashni amalga oshirgan deb topilgan.
Shu bilan birga, Uzum Market tomonidan maxsus komissiyaga raqobatni cheklashga olib kelgan harakat bozor ishtirokchilari, iste’molchilarga bevosita moddiy zarar yetkazilgani to‘g‘risidagi asosli dalillar va hujjatlar taqdim etmagani bois, maxsus komissiya holatni iqtisodiy jihatdan past ta’sirli deb baholadi va moliyaviy sanksiyalarni sud tartibida qo‘llashni lozim deb topmadi.
Yuqorida aniqlangan qonunbuzilish holatiga muvofiq, qo‘mita maxsus komissiya tomonidan YandexGo UB MCHJga nisbatan:
- Yandeks Marketga oid mazkur reklama roligini ommaviy axborot vositalaridan olib tashlash orqali qonunbuzilish holatini bir oy muddatda bartaraf etish;
- reklama roligini OAVdan olib tashlagani haqida tasdiqlovchi hujjatlarni 14-avgustga qadar qo‘mitaga taqdim etish bo‘yicha ko‘rsatma berildi.
Uzum Market MCHJ matbuot xizmatining “Daryo”ga ma’lum qilishicha,vaziyatni huquqiy maydonda hal qilish muhim edi, aynan sog‘lom raqobat sohani oldinga siljitadi.
“O‘zbekistonda elektron tijorat bozori faol rivojlanmoqda va biz yangi o‘yinchilarni mamnuniyat bilan kutib olmoqdamiz — aynan sog‘lom raqobat sohani oldinga siljitadi. Shu bilan birga, biz foydalanuvchilarni chalg‘itmaydigan halol targ‘ibot usullariga rioya qilishni prinsipial jihatdan muhim deb hisoblaymiz. Biz uchun vaziyatni huquqiy maydonda hal qilish muhim edi va umid qilamizki, bu yagona holat istisno bo‘lib qoladi. Pirovardida, bozordagi barcha kompaniyalarning umumiy maqsadi onlayn xarid madaniyatini rivojlantirish, infratuzilmani mustahkamlash hamda O‘zbekistondagi odamlar turmushini yengillashtirish va qulayroq qilishdan iborat bo‘lishi lozim”, deydi kompaniya vakili.
Qo‘mita maxsus komissiyaning ushbu qaroridan norozi bo‘lgan tomon qo‘mitaning apellyatsiya kengashiga yoki sudga murojaat qilish huquqiga egaligini ma’lum qildi.
Izoh (0)