AQSHning Viskonsin shtatida yashovchi 17 yoshli Nikita Kasap o‘z ota-onasini o‘ldirdi. Qotillik prezident Donald Trampga suiqasdga urinishning bir qismi bo‘lgan. Bu haqda maxfiylikdan chiqarilgan hujjatlarga tayanib CNN xabar berdi.
Jinoiy ish bo‘yicha hujjatlar Federal qidiruv byurosi (FQB) tomonidan oshkor etilgan. Unga ko‘ra, voyaga yetmagan Kasap 11-fevraldagi qotillikdan so‘ng 10 kundan ortiq jasadlar bilan bir uyda yashagan. Keyichalik u o‘ldirilgan o‘gay otasining mashinasida ketayotganda yonida o‘qotar qurol bilan politsiyachilar tomonidan ushlangan.
Hibsga olinganidan so‘ng, o‘smir 7-may kuni bo‘lib o‘tadigan sud eshituvlarigacha vaqtinchalik saqlash muassasasiga joylashtirilgan.
Tergov davomida Kasapning ota-onasini o‘ldirishiga “moliyaviy mustaqillik va erkinlikka erishish” istagi sabab bo‘lgani aniqlangan. Biroq o‘smirning telefonidan “To‘qqiz burchak ordeni” (The Order of Nine Angles) nomli neonatsistik tashkilotga oid materiallar topilgach, tergov yanada chuqurlashgan.
Kasap ushbu ekstremistik guruh a’zolari bilan faol aloqa qilgani, shuningdek, uch betlik manifest yozgani aniqlangan. Unda AQSH prezidentini ag‘darish, “oq irqni qutqarish” zarurligi, o‘ldirish usullari, bomba yasash bo‘yicha ko‘rsatmalar va prezidentga qarshi terrorchilik harakatlarini amalga oshirish rejalari bayon etilgan. Hujjatda, shuningdek, Adolf Gitlerning suratlari va “Hail Hitler hail the white race” matni ham aniqlangan.
Tergovga AQSH Maxfiy xizmati hamda FQB jalb etilgan. Kasap boshqaruvidagi avtomobildan ayollarga tegishli taqinchoqlar, elektron qurilmalar, taxminan 14 ming dollar miqdoridagi naqd pul va bank hujjatlari musodara qilingan.
Shu bilan birga, tergovchilar Kasap Telegram’dagi yozishmalarida suiqasd sodir etilgan taqdirda Ukrainaga qochish imkoniyatini muhokama qilganini aniqlagan.
Hozirda Kasapga birinchi darajali qotillik, fitna va AQSH prezidentiga suiqasd qilishga urinish kabi to‘qqizta ayblov qo‘yilgan. Gumonlanuvchi hozirda AQSH federal qamoqxonalaridan birida saqlanmoqda, agar uning aybi isbotlansa, u ko‘p yillik qamoq jazosiga hukm qilinishi mumkin.
Izoh (0)