АҚШда истиқомат қилаётган ватандошлар ўртасида анъанавий тарзда ўтказиладиган “Navruz Cup” футбол турнирининг бу йилги босқичи ҳам юқори савияда ташкил этилди. Турнир “Mahalla USA” жамияти ташаббуси билан ўтказилиб, унга Нью-Жерси штатидаги “Туркистон” жамияти мезбонлик қилди.
Мусобақада Калифорния, Теннесси, Иллинойс, Оҳаё, Канзас, Нью-Ёрк ва Нью-Жерсидан жами 15 жамоа иштирок этди. Турнирда фахрий меҳмон сифатида икки карра Осиёнинг энг яхши футболчиси Сервер Жепаров иштирок этди.
Мусобақа юқори даражада ташкил этилган. Жамоаларнинг тайёргарлиги, футболчиларнинг маҳорати эътиборга молик. Уларнинг айримлари бемалол Ўзбекистон биринчилиги ёки Про-лигасида ўйнай олади, деди Жепаров.
Финалда “Лочин” (Канзас) жамоаси “Динамо” (Нью-Жерси) устидан 2:0 ҳисобида ғалаба қозониб, чемпионликни қўлга киритди. Учинчи ўрин эса “Ҳамкор” (Огайо) жамоасига насиб этди.
Мусобақа доирасида Наврўз байрами ҳам кенг нишонланди: ош, сумалак, спорт беллашувлари ва Ўзбекистон халқ артисти Изро Малаковнинг куй-қўшиқлари иштирокчиларга байрамона кайфият улашди.
Отабек Эшмаматов, Нью-Жерси
Изоҳ (0)