Turkiyada 6-fevral kuni sodir bo‘lgan kuchli yer qimirlashlari oqibatida sodir bo‘lgan falokatlar sabab mamlakatdagi barcha sport tadbirlari bekor qilindi.
Bu haqda Turkiya Yoshlar va sport vaziri Mehmet Muharram Kasapo‘g‘lu ma’lum qildi.
Xabarlarga ko‘ra, “Malatyaspor” futbol klubi darvozaboni Ayyub Turkaslan zilzila oqibatida vafot etgan. Zilzila markazlaridan biri bo‘lgan Hatay viloyatining “Hatayspor” klubining 4 nafar futbolchisi va murabbiylar shtabining ikki vakili xarobalar ostidan qutqarib olingan. Hozircha klubning sport direktori va “Chelsi” sobiq futbolchisi Kristian Atsuning taqdiri noma’lumligicha qolmoqda.
Turkiyada bo‘lib turgan o‘zbekistonlik sportchilarda nima gap?
Turkiyaga musobaqa va mashgʻulotlarga joʻnab ketgan Oʻzbekiston sport delegatsiyasi aʼzolariga zilzila oqibatida zarar yetmagan, deya ma’lum qilmoqda Yoshlar siyosati va sport vazirligi. Qayd etilishicha, vazirlik va MOQ o‘zbekistonlik sportchilar bilan doimiy muloqotda bo‘lib turibdi hamda ularning holati doimiy tarzda nazorat qilib borilmoqda.
Erkin kurash boʻyicha O‘zbekiston yoshlar terma jamoasi Turkiyaning Kaxramanmarash shahrida 3—6-fevral kunlari o‘tishi belgilangan xalqaro musobaqada ishtirok etayotgan edi. Biroq mazkur hudud ayni paytda zilzila epitsentriga aylanib qoldi. Ayni paytda O‘zbekistonning Turkiyadagi elchixonasi yordami bilan sportchilarni Anqara shahriga jo‘natish choralari ko‘rilmoqda. Shundan so‘ng terma jamoa Anqara—Istanbul—Toshkent yo‘nalishi bo‘yicha O‘zbekistonga qaytib keladi. Hozirda sportchi va murabbiylarning barchalari sog‘-salomat, — deyiladi bayonotda.
Shuningdek, O‘FA Turkiyada o‘quv-mashg‘ulot yig‘inlari o‘tkazayotgan futbol bo‘yicha O‘zbekistonning turli yoshdagi terma jamoalari vakillariga zilzila oqibatida zarar yetmaganini ma’lum qilgan.
Izoh (0)