Germaniya Kiyevga Leopard 2 tanklarini berishga rozi bo‘lmasa, Polsha boshqa Yevropa davlatlari bilan Ukrainani qo‘llab-quvvatlash uchun “kichikroq koalitsiya” tuzishga tayyor, dedi bosh vazir Mateush Moravetskiy Polsha matbuot agentligiga bergan intervyusida.
Polsha hukumati rahbari Germaniyaning Kiyevga qurol yetkazib berish borasidagi pozitsiyasini nomaqbul deb atadi. “Har kuni begunoh odamlar o‘lmoqda. Rossiya bombalari Ukraina shaharlarini vayron qilmoqda. Germaniyaga ko‘zini ochib, nemis davlatining salohiyatidan kelib chiqqan holda ish yuritishi uchun yana nima kerak?”, — dedi u.
Polsha bosh vazirining fikricha, Germaniya ittifoqchilarini bahsga tortishni va Kiyevni qo‘llab-quvvatlovchi boshqa davlatlarning harakatlarini sabotaj qilishni to‘xtatishi kerak.
“Ukraina va Yevropa yoki Germaniya bilan yoki Germaniyasiz bu urushda g‘alaba qozonadi. Bu faqat Germaniyaning o‘ziga bog‘liq: yo missiyaga qo‘shilib, Rossiya vahshiyligini to‘xtatadi yoki jim kuzatadi va noto‘g‘ri tarafda bo‘lganlar sifatida tarixda qoladi”, — deya qo‘shimcha qildi Moravetskiy.
Ayni paytda 22-yanvar kuni Parijga tashrif buyurgan Germaniya kansleri Olaf Shols Germaniya Ukrainani “qancha kerak bo‘lsa, shuncha vaqt” himoya qilishini va uni qo‘llab-quvvatlashini ma’lum qildi.
Ukraina uzoq vaqtdan beri G‘arbdagi ittifoqchilaridan, jumladan, NATO mamlakatlarida mavjud Leopard 2 nemis tanklarini so‘rab kelmoqda. Bir qator Yevropa davlatlari, jumladan, Polsha ham o‘z tanklarini Kiyevga jo‘natishga tayyorligini ma’lum qildi, biroq buning uchun Germaniyadan ruxsat kerak. 20-yanvar kuni Ramshtayn bazasida bo‘lib o‘tgan yig‘ilishda yakuniy qaror qabul qilinishi kutilgandi, ammo bunday bo‘lmadi.
OAV ma’lumotlariga ko‘ra, Germaniya hukumati Qo‘shma Shtatlar Ukrainaga Abrams tanklarini yetkazib berish sharti bilan Leopard 2 ni topshirishga rozi bo‘lishi mumkin. Germaniya hukumati vakillari buni rad etdi. 19-yanvar kuni Pentagon AQSHning Ukrainaga yangi harbiy yordam paketini e’lon qildi. Uning tarkibiga Abrams kiritilmagan.
Izoh (0)