Marokash Ukrainaga Chexiyada turgan T-72B tanklarini taqdim etdi, ularning 20 taga yaqini allaqachon Kiyevga yuborilgan, deb xabar beradi Shimoliy Afrikaning Menadefence portali.
Nashr Chexiya bosh vaziri Petr Fialaning 9-yanvar kungi sovet tanklari modernizatsiya qilinadigan Excalibur Army zavodiga tashrif buyurishi bilan bog‘liq fotosuratlarga tayanmoqda. Maqolaga ilova qilingan suratlarda ta’mirdan chiqarilayotgan eski Marokash tanklarini ko‘rish mumkin.
Portal ma’lumotlariga ko‘ra, Marokash armiyasi ixtiyorida 148 ta T-72, 136 ta T-72B va 12 ta T-72BK tanklari bo‘lgan, ular 1999 va 2000-yillarda Belarusdan tutilgan holatda sotib olingan.
Portal qayd etishicha, Ukrainaga qurol-yarog‘ yetkazib berish haqidagi qaror aprel oxirida Germaniyaning Ramshtayn harbiy bazasida bo‘lib o‘tgan sammitda qabul qilingan, unda Shimoliy Afrika mamlakatlaridan Marokash va Tunis qatnashgan.
Rossiya harbiy operatsiyasi boshlanganidan keyin G‘arb mamlakatlari Ukrainaga qurol yetkazib berish hajmini oshirdi. Ba’zi davlatlar Kiyevga sovet davriga oid T-72 tanklarini berdi. Xususan, Polsha bahorda Ukrainaga 230 dan ortiq modernizatsiya qilingan T-72M1 tanklarini yubordi, Shimoliy Makedoniya esa iyulda Kiyevga 2001-yilda uning o‘zidan sotib olingan tanklarni yetkazib berishni boshladi. AQSH noyabrda Ukrainaga Chexiyada saqlanayotgan 45 ta T-72 tanklarini berishni va’da qildi.
Mavzuga doir:
Izoh (0)