Germaniya mudofaa vaziri Kristina Lambrext iste’foga chiqishga qaror qildi. Bu haqda Bild o‘z manbalariga tayanib xabar berdi.
Gazeta suhbatdoshlariga ko‘ra, iste’fo haqidagi tashabbus federal kansler idorasidan emas, uning o‘zidan chiqqan. Hozir Lambrextning lavozimdan ketish sanasi haqidagi masala ko‘rib chiqilmoqda. Shuningdek, ehtimoliy davomchi borasida ichki maslahatlashuvlar olib borilmoqda, deb yozadi nashr. Bild ma’lumotlariga ko‘ra, nomzodlardan biri bundestagning Germaniya qurolli kuchlari bo‘yicha vakili Yeva Xyogl hisoblanadi.
Bo‘lg‘usi iste’fo “misli ko‘rilmagan muvaffaqiyatsizliklar ketma-ketligi”dan keyin yuz beradi, deb yozadi Bild. Chunonchi, Yangi yil arafasida internetda video paydo bo‘lgan, unda Lambrext mushakbozlik fonida Ukrainadagi vaziyatni tilga olib, “ko‘p o‘ziga xos taassurotlar olgani” va qiziqarli odamlar bilan ko‘plab uchrashuvlar o‘tkazganini ta’kidlagandi. Video hukumat doiralarida noroziliklar g‘alayonini keltirib chiqardi.
Bundan tashqari, u Kiyevning o‘z-o‘zini mudofaa qilish kuchlari uchun kaskalar yetkazib berish taklifi uchun ham tanqid qilindi. Bild ma’lumotlariga ko‘ra, Lambrextning xizmat safari chog‘ida uning o‘g‘li bundesver vertolyotida tushgan surat ham mojaroga sabab bo‘lgan.
Kristina Lambrext 2021-yil 8-dekabrdan buyon Germaniya mudofaa vaziri lavozimini egallab keladi. U Germaniya Sotsial-demokratik partiyasi a’zosidir. Bungacha adliya va iste’molchilar huquqlarini himoya qilish vaziri (2019—2021-yillar) hamda oila, keksa fuqarolar, ayollar va yoshlar vaziri (2021-yil) lavozimlarini egallagan.
Rossiya Ukrainada harbiy operatsiya boshlaganidan buyon Lambrext Germaniya Ukrainaga qancha kerak bo‘lsa, shuncha yordam berishga tayyorligini bir necha marta aytib o‘tgan.
Biroq Lambrext Ukrainaga og‘ir harbiy texnika — Leopard tanklari yoki Marder piyoda jangovar mashinalarini yetkazishdan bosh tortib, buni NATOning boshqa hech qaysi mamlakati Ukrainaga bunday sinfdagi harbiy texnikani taqdim etmayotgani bilan izohlagandi. Shuningdek, u Germaniyaning o‘zida og‘ir qurol-yarog‘lar yetarli miqdorda emasligini ta’kidlagandi.
Yanvar o‘rtalarida The New York Times Vashington va Berlin o‘rtasida Ukrainaga tanklar yetkazib berish bo‘yicha faol muzokaralar olib borilayotganini ma’lum qilgandi. Nashr ma’lumotlariga ko‘ra, Germaniya kansleri Olaf Shols ittifoqdoshlari tomonidan tobora kuchliroq bosimga uchramoqda, ular undan Leopard tanklarini yetkazish bo‘yicha roziligini talab qilmoqda.
Bloomberg ma’lumotlariga qaraganda, Germaniya hukumati, katta ehtimol bilan, Ukrainaga Leopard og‘ir tanklarini yetkazib berishga ruxsat beradi, bu haqdagi qaror ittifoqdosh mamlakatlar mudofaa vazirliklari vakillarining Ramshtayn aviabazasida 20-yanvarga belgilangan uchrashuvigacha qabul qilinishi kerak.
Agentlik manbalari qayd etishicha, Lambrext Ramshtayndagi uchrashuvda Leopard tanklarini yetkazib berish bo‘yicha “aniq qaror”ni e’lon qilishi kerak.
Izoh (0)