Germaniya G‘arb namunasidagi tanklarni Ukrainaga yetkazib berishga qaror qilsa, AQSH bunga qarshilik qilmaydi, chunki Kiyevda ularga ehtiyoj bor. Bu haqda Amerika davlat kotibi Entoni Blinken Germaniyaning Myunster shahridagi matbuot anjumanida ma’lum qildi.
Jurnalistlardan biri Blinkenga Germaniyada yuzlab zirhli harbiy mashinalar va tanklar borligini, ammo kansler Olaf Shols “o‘zgarib borayotgan sabablar”ga ko‘ra ularni Kiyevga berishdan bosh tortayotganini aytdi. Berlin G‘arbda ishlab chiqarilgan tanklarni yubormayotganiga sabab — AQSH ham ularni yubormayapti, dedi jurnalist.
“Tanklar masalasiga kelsak: bizda qarshilik yo‘q. Aslida biz ularni yetkazib berishga qaror qilgan har qanday mamlakatni qo‘llab-quvvatlaymiz”, — deya javob berdi Blinken.
Har bir mamlakat Ukrainani qay tarzda qo‘llab-quvvatlashni o‘zi hal qiladi, AQSH unga haqiqatda nima zarurligini va nimani samarali qo‘llay olishini diqqat bilan kuzatmoqda, deya davom etdi davlat kotibi. Shu bilan birga, Blinken ta’kidlashicha, Kiyevga qurol yetkazib berish masalasini G‘arb mamlakatlari Ramshtayn bazasidagi uchrashuvlari chog‘ida birgalikda ko‘rib chiqadi.
Germaniya mudofaa vaziri Kristina Lambrext 18-sentabr kuni mamlakat Ukrainaga G‘arb nusxasidagi jangovar tanklarni yubormasligini, chunki g‘arblik sheriklarsiz, yakka o‘zi ish tutishni istamasligini aytgandi.
Germaniya kansleri Olaf Shols bu mavzuda gapirar ekan: “Bu juda xavfli urush. Biz Ukrainani qo‘llab-quvvatlaymiz. Biz buni NATO va Rossiya o‘rtasidagi urushga olib kelmaydigan tarzda amalga oshirmoqdamiz, aks holda bu falokatli bo‘lardi”, — degan edi.
Zelenskiy esa Germaniya Ukrainaga harbiy texnikani, shu jumladan, Qurolli kuchlar uchun zarur bo‘lgan tanklarni yetkazib berish haqidagi qarorlarni mustaqil qabul qilishi kerakligini aytgandi.
“Agar bizga (tank va zirhli texnikani) berishni istamasangiz, xafa bo‘lish yo‘q, siz mustaqil davlatsiz — bermasangiz, bermang, lekin avval Amerika bersin, keyin Germaniya, undan keyin Polsha beradi, demang. Kerakmas. Hamma o‘zi uchun javob bersin”, — degan edi Ukraina prezidenti.
Izoh (0)