Germaniya Ukrainaga o‘nlab “Gepard” o‘ziyurar zenit qurollarini yetkazib beradi, dedi Germaniya mudofaa vaziri Kristina Lambrext. Reuters xabariga ko‘ra, ular Germaniyaning Krauss-Maffei Wegmann kompaniyasi omborlaridan jo‘natiladi. Ta’minot qachon boshlanishi aytilmagan.
AQSh Mudofaa vaziri Lloyd Ostin Germaniyaning “50 ta ‘Gepard’ qurilmasini yuborish” qarorini olqishladi. “Ushbu qurilmalar Ukraina uchun chinakam imkoniyatlarni taqdim etadi”, dedi u Kristina Lambrext bilan Germaniya g‘arbidagi Amerikaning Ramshtayn aviabazasidagi muzokaralardan so‘ng.
“Gepard” o‘ziyurar zenit quroli nemis armiyasi zenit kuchlarining ustunlaridan biri hisoblanadi. “Ikkita 35 millimetr kalibrli pulemyotdan iborat ushbu qurol jangovar bo‘linmalarni past uchadigan samolyotlar va vertolyotlardan himoya qilish va yerdagi nishonlarni yo‘q qilish uchun mo‘ljallangan”, — deyiladi bundesver xabarida. Germaniyada “Gepard”lardan 2010-yilgacha foydalanilgan.
Die Welt nashrining yozishicha, Germaniyaning Rheinmetall konserni Ukrainaga 88 ta Leopard 1A5 tankini topshirishga tayyor. Kompaniya Germaniya hukumatidan qurilmalarni yetkazib berish uchun ruxsat so‘ragan. Dastlabki 22 ta tank Ukrainaga bir necha hafta ichida, qolganlari esa yil oxirigacha yuborilishi kutilmoqda.
Kil universiteti Xavfsizlik siyosati institutida tashrif buyurgan mutaxassis Marsel Dirsusning aytishicha, Germaniya qarorining asl ahamiyati jang maydoniga “Gepard”larning zarurligi emas, balki ular beradigan signalda. “Yevropadagi eng yirik iqtisodiy davlat Ukrainani qo‘llab-quvvatlashga jiddiy kirishmoqda, yordam hajmi oshadi”, — dedi u.
Fevral oyida Germaniya kansleri Olaf Shols mamlakat Ukrainaga qurol yetkazib bermasligini aytgandi. Aprel boshida esa Rheinmetall konserni Ukrainaga 50 ta “Leopard 1” eski tanklarini yetkazib berishga qaror qilgan.
Izoh (0)