Oq uy Ukraina hukumatiga Amerikadan qurol yetib kelguniga qadar frontda yirik hujumni boshlamay turishni maslahat berdi. Bu haqda jurnalistlarga Jo Bayden ma’muriyatidagi yuqori mansabli amaldor anonimlik sharti bilan ma’lum qildi, deb yozadi Reuters.
Mansabdorning so‘zlariga ko‘ra, AQSH va Ukrainaning Ukraina qurolli kuchlari qarshi hujumi imkoniyati haqidagi muzokaralari ukrainaliklar dastlab AQSH tomonidan taqdim etilgan eng yangi qurol-yarog‘dan foydalanishni o‘rganishga yetarlicha vaqt ajratishi kerakligi nuqtayi nazaridan olib borilgan.
Jurnalistlar suhbatdoshi ta’kidlashicha, shuningdek, Bayden ma’muriyati Kiyevga Abrams tanklarini yetkazib bermaslik qaroriga qat’iy sodiq qolmoqda, ular, Pentagon da’vo qilishicha, o‘ta qimmat, foydalanish murakkab va ko‘p yonilg‘i sarflaydi.
19-yanvar kuni Jo Bayden Ukrainaga 2,5 milliard dollarlik yangi harbiy yordam paketini ma’qulladi, unga o‘nlab Bradley jangovar piyoda mashinalari va Stryker bronetransportyorlari kirdi.
Avvalroq Ukraina Mudofaa vazirligi Rossiya armiyasi tomonidan yangi hujum kutilayotganini, shu bilan birga, martga qadar “butun Ukraina bo‘ylab, Qrimdan Donbassgacha” o‘zlari qarshi hujumga o‘tishni rejalashtirayotganini aytgandi. G‘arb razvedkalari vakillari fikricha, Ukraina qurolli kuchlari qishda yoki “bahorgi loygarchilik mavsumidan keyin” darhol hujumga o‘tishga tayyorlanmoqda.
Hujum uchun Ukraina g‘arblik ittifoqdoshlaridan tanklar, birinchi o‘rinda Leopard 2 tanklarini so‘ramoqda, u ko‘plab NATO mamlakatlari arsenallarida mavjud. Bir qator Yevropa mamlakatlari Kiyevga o‘z tanklarini yuborishga shayligini bildirdi, ammo buning uchun Germaniya ruxsat berishi kerak. Bu haqdagi qaror 20-yanvar kuni Ramshtayn aviabazasida NATO mudofaa vazirlari uchrashuvida qabul qilinishi kutilgandi, biroq tomonlar uzil-kesil kelishuvga erisha olmadi.
Izoh (0)