“Daryo” nashri 23-yanvarda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Fuqarolikni olgan muhojirlar urushda qatnashish majburiyati sabab Rossiyadan chiqib keta olmaydi
Rossiyaga ishlashga kelib, keyinchalik Rossiya fuqaroligini olgan Markaziy Osiyo mamlakatlari fuqarolari Rossiyani tark etib, uyga qaytib keta olmaydi, chunki ularga nisbatan safarbarlik to‘g‘risidagi qonunlar amal qiladi. Bu haqda “Osiyo davlatlari va Ukraina inqirozi” Telegram kanali yozmoqda.
Rossiya pasportiga ega Qirg‘iziston va Tojikiston fuqarolari “Radio Svoboda”ga ma’lum qilishicha, ular Rossiyadan chiqib keta olmagan — chegarada ular safarbarlik ro‘yxatlariga kiritilgani, shu sababli Rossiyada qolishi kerakligini aytishgan. Ularning Rossiya fuqaroligi bo‘lmagan do‘stlari esa mamlakatni bemalol tark etgan.
Ushbu mamlakatlar hukumatlari ogohlantirishicha, ular bunday vaziyatda muhojirlarga yordam bera olmaydi, chunki ular allaqachon Rossiya fuqaroligini olgan va o‘z zimmasidagi majburiyatlarni bajarishi kerak.
Avvalroq Rossiya Tergov qo‘mitasi rahbari Aleksandr Bastrikin Rossiya fuqaroligiga ega muhojirlar urushda qatnashishi kerakligini aytgandi. Uning so‘zlariga ko‘ra, Rossiya fuqaroligini olish orqali muhojirlar nafaqat huquqlarni, balki amaldagi qonunchilikda belgilangan majburiyatlarni ham oladi. Ulardan biri Rossiya Qurolli kuchlari talablariga muvofiq harbiy xizmatni o‘tashdir.
Rossiyada safarbarlik yakunlansa-da, safarbarlik to‘g‘risidagi farmonning ba’zi nizomlari amalda
Rossiya prezidentining matbuot kotibi Dmitriy Peskov Rossiyada safarbarlik yakunlanganini, biroq safarbarlik to‘g‘risidagi farmonning ba’zi nizomlari amal qilishda davom etayotganini ma’lum qildi, deb yozadi “Interfaks”.
Peskovning so‘zlariga ko‘ra, Mudofaa vazirligi armiyaga chaqiriq bo‘yicha reja bajarilgani haqida hisobot berganidan keyin Rossiyada safarbarlik yakunlangan, ammo farmonning o‘zi amal qilishda davom etmoqda, chunki safarbarlik “boshqa tadbirlarni ham o‘z ichiga oladi”.
“Safarbarlik fuqarolarni harbiy xizmatga chaqirishdan tashqari, qurolli kuchlar vazifalarining bajarilishini ta’minlash uchun zarur bo‘lgan boshqa tadbirlarni ham o‘z ichiga oladi. Shu jihatdan farmon amal qilishda davom etyapti”, — dedi matbuot kotibi.
Peskov hujjatning aynan qaysi nizomlarini nazarda tutayotganiga aniqlik kiritmadi, lekin “bu o‘sha yopiq bandga ham tegishli ekani”ni qo‘shib qo‘ydi. Safarbarlik to‘g‘risidagi farmonda bitta e’lon qilinmagan band bo‘lib, unda safarbar etiluvchilar soni haqidagi axborot bo‘lishi mumkinligi taxmin qilinadi.
NATO davlatlari Ukrainani qo‘llab quvvatlashga tayyor ammo qurol yetkazib berishda pozitsiyalar turlicha
Polsha bosh vaziri Mateush Moravetskiy matbuot agentligiga bergan intervyusida:Germaniya Kiyevga Leopard 2 tanklarini berishga rozi bo‘lmasa, Polsha boshqa Yevropa davlatlari bilan Ukrainani qo‘llab-quvvatlash uchun “kichikroq koalitsiya” tuzishga tayyor ekanini aytdi.
Polsha bosh vazirining fikricha, Germaniya ittifoqchilarini bahsga tortishni va Kiyevni qo‘llab-quvvatlovchi boshqa davlatlarning harakatlarini sabotaj qilishni to‘xtatishi kerak. O‘z navbatida 22-yanvar kuni Parijga tashrif buyurgan Germaniya kansleri Olaf Shols Germaniya Ukrainani “qancha kerak bo‘lsa, shuncha vaqt” himoya qilishini va uni qo‘llab-quvvatlashini ma’lum qildi.
Ukraina uzoq vaqtdan beri G‘arbdagi ittifoqchilaridan, jumladan, NATO mamlakatlarida mavjud Leopard 2 nemis tanklarini so‘rab kelmoqda. Bir qator Yevropa davlatlari, jumladan, Polsha ham o‘z tanklarini Kiyevga jo‘natishga tayyorligini ma’lum qildi, biroq buning uchun Germaniyadan ruxsat kerak. 20-yanvar kuni Ramshtayn bazasida bo‘lib o‘tgan yig‘ilishda yakuniy qaror qabul qilinishi kutilgandi, ammo bunday bo‘lmadi.
O‘zbekiston Afg‘onistonga elektr energiyasini yetkazishni qayta tiklaydi, Turkmaniston esa O‘zbekistonga gaz yetkazib beradi
Energetika vazirligi O‘zbekistondan Afg‘onistonga elektr energiyasini yetkazib berish qayta tiklanishi rejalashtirilayotganini e’lon qildi.
2023-yilning 14-yanvaridan O‘zbekistonda havo haroratining keskin pasayishi oqibatida issiqlik elektr stansiyalarida yoqilg‘i ta’minotida vujudga kelgan muammolar, ya’ni yoqilg‘i tanqisligi va turli nosozliklar paydo bo‘lgani, shuningdek, respublika iste’molchilarini barqaror elektr energiyasi bilan ta’minlash maqsadida Afg‘onistonga elektr energiyasini yetkazib berish vaqtinchalik to‘xtatilgan edi.
O‘z navbatida hozirgi holatga Energetika vazirligi quyidagicha tushuntirish berdi: “O‘zbekistonda ishlab chiqarilgan va ichki iste’molga mo‘ljallangan elektr energiyasi eksportga yo‘naltirmaydi. Hukumatlararo kelishuvga muvofiq amalga oshiriladigan elektr energiyasi import amaliyotining bir qismi Afg‘onistonga (imzolangan shartnomalarga muvofiq) eksport qilinadi”.
Eslatib o'tamiz, 2023-yilning 21-yanvaridan boshlab O‘zbekistonga Turkmanistondan gaz yetkazib berish qayta tiklandi.
Izoh (0)