Shimoliy Koreya Mehnat partiyasi Markaziy qo‘mitasi bo‘lim mudiri o‘rinbosari, KXDR yetakchisining singlisi Kim Yo Chjon Janubiy Koreya bilan harbiy qarama-qarshilik yuzaga kelgan taqdirda, mamlakatning yadroviy kuchlari “o‘z vazifasini bajarishini” ma’lum qildi. Uning bayonoti Koreya markaziy telegraf agentligi tomonidan e’lon qilingan.
“Janubiy Koreya biz bilan harbiy ziddiyatni tanlaydigan bo‘lsa, yadroviy jangovar kuchlarimiz, shubhasiz, o‘z vazifasini bajaradi”, — deydi Kim Yo Chjon.
Mehnat partiyasi Markaziy qo‘mitasi bo‘lim mudiri o‘rinbosarining ta’kidlashicha, agarda Janubiy Koreya KXDRga qarshi biror-bir harbiy harakatlarni qo‘llamaydigan bo‘lsa, u “hujum nishoni sifatida ko‘rib chiqilmaydi”.
1-aprel kuni Janubiy Koreya mudofaa vaziri So Uk Pxenyan Seulga qarshi raketalarini yo‘naltirsa, respublika Qurolli kuchlari KXDRning qo‘mondonlik obyektlari va raketa uchiriladigan joylariga zarba bera olishini ma’lum qilgandi. Shimoliy Koreya Mehnat partiyasi Markaziy qo‘mitasining kotibi Pak Chon Chxon bunga javoban, agar oldindan zarba berilsa, KXDR Janubiy Koreyadagi asosiy nishonlarni “shafqatsizlarcha” yo‘q qilishini aytgan.
Avvalroq Shimoliy Koreya mintaqadagi AQSH harbiylari hamda ularning “vassal kuchlari”ni kuzatish va ularga oid ma’lumotlarni to‘plash maqsadida sun’iy yo‘ldosh yaratishi ma’lum bo‘lgandi.
Izoh (0)