KXDR hech qachon Janubiy Koreya prezidenti Yun Sok Yol tomonidan taklif etilgan, yarim orolni yadroviy qurolsizlantirish evaziga iqtisodiy va texnologik yordamni ko‘zda tutuvchi “qo‘rs tashabbus”ga rozi bo‘lmaydi. Bu haqda Shimoliy Koreya yetakchisi Kim Chen Inning singlisi Kim Yo Chjon ma’lum qildi, deb yozadi “RBK”.
17-avgust kuni Yun Sok Yol KXDRni AQSH bilan aloqalarni normallashtirishga diplomatik ko‘mak, qurolsizlanish masalalari muhokamasi, moliyaviy va xalqaro investitsiyaviy ko‘mak, shuningdek, oziq-ovqat, qishloq xo‘jalik texnologiyalari va tibbiy xizmat bilan bog‘liq yordam evaziga yarim orolni zudlik bilan denuklearizatsiya (yadroviy qurolsizlantirish) qilishga chaqirgan edi.
“Prezident Yun Sok Yolning o‘z tabrik nutqida e’lon qilgan denuklearizatsiya yo‘l xaritasi haqidagi g‘oyasi ahmoqlikning cho‘qqisi hisoblanadi va biz hech qachon bu bilan shug‘ullanmaymiz”, — dedi Kim Yo Chjon.
U Janubiy Koreya prezidentining ushbu bayonotidan keyin undan “ovozini o‘chirishni” talab qildi.
“Agar aytishga boshqa gapi bo‘lmasa, behuda gap gapirmasdan, ovozini o‘chirib o‘tirsa, o‘zining obro‘si uchun yaxshiroq bo‘lardi. Nahotki u iqtisodiy hamkorlikni Shimolning obro‘si va yadro quroliga almashtirish mumkin, deb hisoblasa?” — deyiladi Kim Yo Chjonning KCNA davlat axborot agentligi e’lon qilgan bayonotida.
2018-yilda AQSH va KXDR xavfsizlik kafolati va sanksiyalarning olib tashlanishi evaziga Shimoliy Koreyani denuklearizatsiya qilish bo‘yicha muzokaralarni boshlagan edi. Ammo keyinroq Pxenyan Vashingtonni muzokaralarni cho‘zishda aybladi va bitimni “hiyla-nayrang” deb atadi. 2020-yil boshida Kim Chen In agar AQSH KXDRga nisbatan dushmanlik siyosatidan voz kechmasa, “yarim orol hech qachon denuklearizatsiya bo‘lmasligi”ni aytgandi.
BMT bosh kotibi Antoniu Guterrish yadro arsenaliga ega mamlakatlarni bir necha marta qurolsizlanish yo‘liga qaytishga chaqirgan va yadro quroli qo‘llanilmasligining yagona kafolati — uning to‘liq yo‘q qilinishi ekanini aytgandi. O‘zining Janubiy Koreyaga so‘nggi tashrifi chog‘ida ham u KXDRni yadroviy qurolsizlanishga da’vat etgandi.
Bunga javoban Shimolyi Koreya TIV vakili Kim Son Gyon bu bayonotlar “xolis va adolatli” bo‘lmagani sababli bosh kotib majburiyatlariga zid ekanini va ular “xalqaro hamjamiyatning odilona pozitsiyasi”ni bildira olmasligini aytgandi.
Izoh (0)